Dili(timorpost.com)— Sarani Katólika Timor-Leste selebra loron Jesus Kristu moris hi’as (Páskua), depois mate iha Krús hodi selu ema hotu nia sala.
Loron Páskua, katak sarani Katólika hanoin hikas Na’i Jesus Kristu nia terus hosi mate.
Selebrasaun loron Páskua tinan 2023 ne’ebé hala’o tuir kultu Páskua Parókia Imaculada Conceição da Virgem Santa Maria Katedrál Dili, Prezide hosi Sua Eminénsia Dom Virgílio Kardeál Do Carmo Da Silva, SDB.
“Ohin ita hahú liturjia Kinta-Feira Santa ninian hahú ho Sinál Krús, maibé ita hotu sei haree bainhira misa termina sei la halo Sinál Krús hanesan baibain liturjia nakloke hela de’it, aban mós hanesan bainhira Amu Lulik tama la hahú ho Sinál Krús hahú ho orasaun de’it”, dehan Sua Eminénsia Dom Virgílio Kardeál Do Carmo Da Silva, SDB liuhosi Omilia Páskua iha Katedrál Dili, Kinta (06/04/2023).
Nune’e, iha Sábadu Aleluia mós la iha Sinál Krús katak durante loron tolu hanaran tribun paskál, tribun signifika selebrasaun ida ne’ebé úniku hahú hosi Jesus nia terus to’o moris hi’as.
Nia dehan, loron Kinta-Feira Santa hanesan loke odamatan hodi hanoin hikas Jesus nia mate no taka iha Sábadu Aleluia ho bensaun.
Kardeál ne’e hateten, períodu ida iha festa Páskua dala ida, durante loron tolu tempu atu halo sakrifikasaun no tempu hasan ita ema hodi tuir Jesus nia terus no mate.
“Tan ne’e loron tolu ne’e konvida ita atu tuir kompletu tanba ema ida-idak mai ho ninia istória no preokupasaun rasik, tanba ita mai iha uma kreda ne’e hakarak deskobre no buka buat ruma, iha liturjia Páskua ninia aprezenta mai ita katak sentru selebrasaun Páskua mak Eukaristia”, nia katak.
Sua Eminénsia Dom Virgílio Kardeál do Carmo da Silva afirma, hahú Segunda to’o Sábadu no Janeiru to’o Dezembru fó hanoin sarani katólika katak atividade mak Eukaristia.
Na’i maromak halo ema nia isin lolon kompletu, los duni katak maromak mak kriadór universal ninian no prezensa iha fatin hotu-hotu husu poderoju ho kbiit bele halo buat hotu.
“Isin ne’ebé hela iha rai maibé isin ne’e moris ba nafatin to’o liturjia paskua sai sasin ba Jesus Kristu nian isin lolos ne’ebé moris husi mate ida-ne’e mak esperansa sarani ida-idak nian tanba ita nia isin mós partisipa iha Jesus nia futar oin”, kata nia.
2,536 total views, 3 views today
Bele hare Video Seluk :