Dili(timorpost.com)—Presidente Autoridade Munisipál Aileu, João Bosco dos Santos, partisipa iha konferénsia Partidu Kmanek Haburas Unidade Nasionál Timor Oan (KHUNTO) nian atu hametin estrutura Postu no Munisípiu, hodi organiza-an ba vitória iha 2027/2028 hatete, hanesan Prezidente Autoridade sai aman ba partidu hotu inklui Partidu KHUNTO Munisípiu Aileu.
“Ha’u hanesan Prezidente Autoridade iha munisípiu ida ne’e, sai hanesan aman ba partidu hotu-hotu inklui ita boot sira KHUNTO hodi tau matan ba ita boot sira hotu”, João Bosco dos Santos, nia preve palavras iha konferénsia Partidu Kmanek Haburas Unidade Nasionál Timor Oan (KHUNTO) nian, iha salaun SJMA, Domingu (17/03).
PAM Aileu, agradese ba Partidu KHUNTO, tanba bele prepara ona kondisaun ou rekursu umanu ne’ebé di’ak tebes.
“Agradese tebes, tanba ita boot sira di’ak tebes, bele prepara ona kondisaun ou rekursu ho nune’e, ha’u hakarak hato’o hela katak, hanesan Prezidente, ha’u husu atu ita boot sira kritika governu ida ne’e, tanba partidu polítiku sira bele kontribui ideia, atu bele loke tan ha’u-nian hanoin. Tanba desizaun balu ne’ebé ha’u foti dala-ruma la kondis ho ita-boot sira-nia hakarak tanba ne’e ha’u presiza ita nia servisu hamutuk”, PAM Aileu Agradese.
Oportunidade loron ohin nian karik partidu ida mak ukun, maibé hein katak, iha futuru partidu KHUNTO mós hahú preparadu ona hodi halo buat di’ak ba Aileu, tanba hirak ne’e Aileu oan hotu.
“Ha’u-nia hakarak ne’e ita boot sira tenke kritika dunik, maibé, kritika tenke fó mós solusaun, no ha’u husu ba estrutura Partidu KHUNTO atu prepara ita-boot sira nia ema ida hodi reprezenta iha Konsellu Konsultivu Munisipál (CCM) nian. Tanba ita ko’alia kona-ba dezenvolvimentu Aileu nian, presiza ita hotu nia ideia no tenke identifika ema ida ne’ebé maka espertu, hanoin konstrutivu ka analiza foka ba dezenvolvimentu”, PAM husu.
Karik buat balu la satisfás bele hakerek karta ka halo relatóriu balu ba prezidente, tanba iha nia mandatu ida ne’e, nia lakohi atu ko’alia de’it, maibé tenke hakerek karta ruma atu nune’e, bele arkivu hela.
“Ikus liu ha’u husu ba membru partidu ka juventude sira, atu labele hafo’er partidu nia naran no nafatin unidade atu nune’e bele kria pás iha ita-nia munisípiu, tanba ne’e Parabéns no Susesu nafatin”, nia tenik.
Aleinde ne’e iha fatin hanesan Konselleiru Nasionál Partidu KHUNTO nian, Deputadu Luis Roberto, husu ba estrutura eleitu kaer metin ba ideolojia partidu nian hodi hametin fiar ba partidu KHUNTO iha sosiedade.
Iha konferénsia ida ne’e hetan partisipasaun másimu hosi, Prezidente Autoridade Munisipál Aileu, Xefe Gabinete PAM-Aileu, Area Manager SJMA, Konselleiru Másimu Partidu KHUNTO ho Estrutura Nasionál to’o Munisipál no inklui partisipante sira hotu.
Notísia ne’e Timor Post asesu hosi pájina PAM Aileu nian, Domingu (17/03).
2,589 total views, 3 views today
Bele hare Video Seluk :