DILI (TimorPost.com)—Prezidente Repúblika Jose Ramos Horta realiza palestra hodi ko’alia kona ba programa formasaun diplomasia no direitu umanus no haktuir katak, luta ba demokrasia ne’e prosesu pertenente.
Iha palestra ne’e Xefe Estadu Horta rasik mak sai oradór hodi fahe esperiénsia pasadu nia kona-ba oinsá luta ba direitu umanus.
“Palestra ne’e ha’u halo dala barak ona atus ida ou atus rua iha Australia no mundu, asuntu ne’e hanaran Diplomasia Training Program, la’ós foka de’it ba diplomasia, maibé liga liu ba direitu umanu no demokrasia”, Xefe Estadu ne’e dehan ba Jornalista sira hafoin remata Palestra iha Palasiu Prezidénsia Bairo-Pite, Sesta (25/08).
Iha palestra ne’e, PR mós deskreve kona ba sistema Nasoens Unidas no direitu umanu, ko’alia mós kona-ba solidariedade internasionál, ne’ebé benefísiu ba timoroan barak.
“Programa ne’e ha’u hahú iha Australia, bainhira ha’u simu títulu profesór iha University of Cambridge Satuells, besik tinan tolu nulu ona, ha’u mós dala barak hare tinan tolu nulu ona dezde kampaña direitu umanus iha mundu ne’e avansa maibé situasaun direitu umanus iha mundu mós balun kadavés pior liu-tan”, nia afirma.
Tanba ne’e, esplika ba partisipante sira katak laos tanba ema hatene simu diploma no simu buat ne’ebe nain ulun sira hanorin ne’e resolve ona problema ne’e lae. Tanba situasaun polítika internasionál halo situasaun luta difisil liu atu demokrasia bele moris no buras iha sosiedade.
“Ita hare iha Amérika mós adota sistema demokrasia, eis Prezidente Donald Trump sama nia konstituisaun rasik, mas ema iha ne’ebá luta hodi kontra no depois nia lakon iha eleisaun”, nia konta.
Ramos sublina luta ba demokrasia ne’e prosesu ida ne’ebé permanente, la bele hanoin katak demokrasia ne’e metin ona, dala ruma bele hakiduk iha rai barak, iha ASEAN no mos iha Eropa.
Programa ne’e la’ós atu halo advokasia ba kauza ruma, maibé programa ne’e fó formasaun de’it, la hola parte iha partidu, la komenta kona-ba situasaun espesifika.
“Ha’u pesoalmente komenta mós iha situasaun balun iha Myanmar ne’ebe agora adota hela sistema junta militar, mas programa ne’e lori Universidade nia naran la halo deklarasaun ruma no solidariedade ida ne’e ka ida ne’ebá, kondena ida ne’e kondena ida ne’ebá ne’e. ida ne’e 100% formasaun tékniku akadémiku”. Hakotu.
795 total views, 15 views today
