Dili (Timor Post)—Estudante husi Institutu Ciénsia Saúde (ICS), Fakuldade Saúde, Departamentu Enfermajen, na’in-57 ohin ba hala’o sosializasaun durante semana ida iha munisípiu Bobonaru, Postu Administrativu Maliana, Suku Rita bou, Aldeia Dai tete hodi fahe informasaun kona-ba moras ne’ebe mak porsentu boot.
“Ohin ami ba halao sosializasaun ne’e hodi bele aplika fila fali ami nia koñesimentu ba komunidade sira, ne’ebe durante ami aprende, entaun liuhusi sosializasaun ida ne’e ninia prinsipál maka oinsá ami dezenvolve ami nia koñesimentu ba teoria ne’ebe mak ami estuda ona bele aplika fila fali ba komunidade sira”. Elizabet Jenizia Lopes, estudante ICS, Semester III, Departamentu Enfermajen, dehan iha Kampus ICS, Kinta (30/06).
Nia dehan, atividade sosializasaun ida ne’e hanesan ba fahe informasaun ba komunidade sira ba moras ne’ebe mak ho ninia porsentu boot hanesan Ispa, Tensaun, Dengue, Diária, inklui personal ijiene hanesan toba uza moskiteiru, fase liman ho sabaun atu nune’e komunidade sira bele nafatin atinje saúde diak.
Iha parte hanesan vise reitór asuntu estudante ICS, Erkolando dos Reis Pinto afirma objetivu sosializasaun ne’e oinsá maka atu kapasita estudante ninia mentalidade atu moris ho komunidade no mós estudante sira bele fahe informasaun kona ba setór saúde nian atu nune’e komunidade sira moris ho saudavel.
“Enkuantu ba estudante sira seluk sei iha planu hela hodi ba halo sosializasaun, maibé kada tinan departamentu hotu-hotu tenke ba munisípiu hodi halo sosializasaun liuliu ba iha area rurais nian”. Hateten nia.
Nia apela ba estudante sira katak bainhira ba hala’o sosializasaun ne’e dosente sira sempre akompaña, maibé antes sira ba hala’o sosializasaun ne’e, dosente sira sempre briefing kona-ba oinsá atu hala’o sosializasaun iha baze atu nune’e estudante sira bele fahe informasaun tuir setór saúde nian. Hakotu.
6,735 total views, 3 views today
