DILI-Komisaun Funsaun Públiku (KFP) ho Komisaun Anti Korrupsaun (KAK) husu ba Funsionáriu Públiku (FP) labele abandona servisu iha kampaña ba eleisaun parlamentár 2023.
“Ami enkontru ho Komisaun Anti Korrupsaun ho liña ministériu sira hotu hodi fó hanoin ba funsionáriu públiku sira atu labele abandona sira nia servisu iha loron Segunda to’o Sesta hodi ba tuir fali kampaña partidu nian iha oras servisu nian”, Prezidente Komisaun Funsaun Públiku, Faustino Cardoso, hateten ba Timor Post iha salaun MF Ai-tarak Laran, Segunda (20/03).
Faustino hatete, tinan ne’e tinan polítika, entaun presiza fó hanoin no fó atensaun ba funsionáriu públiku sira halo servisu ho profisionál ho responsabilidade no labele abandona oras servisu nian hodi ba tuir fali kampaña partidu nian.
“Portantu ami la’ós bandu funsionáriu públiku labele envolve iha partidu polítiku sira iha tempu kampaña, maibé tenke respeitu oras servisu nian iha loron Segunda to’o Sesta no labele uza patrimóniu Estadu nian hodi uza ba interese privadu nian”, nia dehan.
Nia hatutan, tinan ne’e polítika partidária atu dehan katak, tinan ne’e nakonu ho polítika iha kontestu demokrasia, tanba mosu eleisaun lejizlativa sei akontese iha fulan Maiu, entaun presiza fó hanoin ba funsionáriu públiku sira atu halo servisu ho domin no labele abandona oras servisu nian.
Tanba ne’e mak, enkontru ne’e konvida liña ministeriais liuliu funsionáriu no kargu xefe sira mai partisipa iha enkontru ida ne’e hodi fó hanoin sira katak, funsionáriu hanesan servidór ba públiku, entaun tenke servisu ho domin no tuir obrigasaun no devér tuir estatutu funsaun publika nian.
Portantu, hanesan prezidente, nafatin fó hanoin no alerta ba funsionáriu no kargu xefe sira hotu atu mantein halo papél servisu ho imparsiál no asegura kontinuidade servisu nian iha instituisaun ida-idak.
Iha fatin hanesan, Komisáriu Anti Korrupsaun (KAK), Sergio Hornai, husu ba funsionáriu públiku sira atu halo servisu ho profisionál no labele tau interese partidu no interese privadu hodi abandona oras servisu nian.
Hanesan KAK nafatin akompaña nafatin servisu iha instituisaun ida-idak liuliu funsionáriu públiku sira atu respeita oras no halo servisu ho profisionál no labele uza patrimóniu Estadu nian ba interese privadu.
“Tanba tinan ne’e tinan polítika, entaun funsionáriu barak bele abandona sira nia servisu hodi partisipa iha kampaña eleisaun, tanba ne’e ami enkontru hamutuk ho liña ministeriais sira hotu hodi halo servisu ho responsabilidade no imparsialidade, independénsia, iha servisu loron-loron nian”, nia dehan.
749 total views, 3 views today
