DILI (timorpost.com)—Bankada CNRT iha Parlamentu Nasionál lamenta ho Deputadu bankada KHUNTO, Luis Roberto da Silva, ne’ebé konsidera nasaun Timor-Leste hanesan Kintál.
“Ha’u hakarak hatete uitoan kona-ba deklarasaun KHUNTO, pela primeira vés ha’u foin haree katak deputadu ida brani mesak muda deklarasaun iha konstituisaun RDTL, RDTL ne’e nasaun ida la’ós Kintál,” Lamenta Deputadu Bankada CNRT, Gabriel Soares, iha plenária Parlamentu Nasionál, (08/04).
Nia hatutan, levante problema edukasaun no tenke konsidera profesór sira ne’e pertense ba nasaun ne’e, la’ós sai hanesan Kintál.
“Ita bele ko’alia ba buat seluk, mai ko’alia kona-ba konseitu estadu labele halimar ho palavra sira hanesan ne’e,” esplika nia.
Nune’e mós Deputada Bankada CNRT, Cedelizia Faria dos Santos, la konkorda ho deklarasaun Deputadu Bankada KHUNTO, Luis Roberto ne’ebé hateten katak Nasaun Timor-Leste hanesan Kintál.
“Ha’u mós la konkorda duni deputadu ida hatete dehan RDTL halo fali Kintál, ita-boot interpreta sasán ne’e loos uitoan ba. Atu halo komparasaun ne’e ba buat boot, labele halo fali buat ida konta fali konstituisaun ida ne’e sala,” lamenta Cedelizia.
Tuir deklarasaun bankada KHUNTO liu husi Deputadu Luis Roberto da Silva hatete iha biban ida ne’e bankada KHUNTO hakarak re-afirma nia pozisaun klaru loloos ba povu kona-ba edukasaun, saúde no ekonomia liuliu foos folin aas iha nasaun ida ne’e.
“Tanba nu’udar deputadu hetan mandatoria husi povu no povu mak na’in loloos hodi tuur iha Carta magna ida ne’e, no tenke hato’o nafatin ba Governu ba iha povu bainhira hasoru problema iha Kintál RDTL ida ne’e,” hateten deputadu ne’e.
Nia salienta, edukasaun mak hanesan janela prinsipál ida hodi transforma sidadaun sira ba futuru ida ne’ebé di’ak no kualifikadu. Tan ne’e, estadu iha devér no obrigasaun hodi fó oportunidade ba Timoroan hotu atu asesu ba edukasaun, hodi garantia sira-nia moris di’ak ne’ebé vigora ona iha artigu-59 KRDTL.
“Ohin loron akontese iha Kintál RDTL ida ne’e, mosu problema estudante sira enfrenta hela, tanba falta profesór sira iha aula hodi tranzmite matéria hodi prejudika tebes ba sira-nia prosesu aprendizajen,” esplika nia.
1,119 total views, 6 views today
Bele hare Video Seluk :
Subscribe to Timorpost
