DILI, (timorpost.com) — Reprezentante Prezidente Repúblika no Governu, Jenerál Reformadu Lere Anan Timur, no Xefe Estadu Maior Jenerál F-FDTL, Tenente Jenerál Falur Rate Laek, partisipa iha komemorasaun loron Independénsia Guiné-Bisau nian ba dala-50. Iha oportunidade konvida mór Xefe Estadu Guiné-Bisau atu mai partisipa selebrasaun loron proklamasaun Independénsia unilaterál ba dala-48 ne’ebé sei realiza iha loro 28 fulan-Novembru 2023.
“Prezidente da Repúblika Guiné-Bisau mós atu mai asiste ita-nia dia de Independénsia Unilaterál dia 28 Novembru 2023, ne’ebé mai ho nia delegasaun ida ne’ebé boot sira sei mai vizita ita”, Reprezentante espesiál Estadu Timor-Leste, Jenerál Reformadu, Lere Anan Timur, informa ba jornalista iha salaun VIP Aeroportu Internasionál Prezidente Nicolau Lobato, Kumoro-Dili, Tersa,(21/11/2023).
Vizita delegasaun Timor-Leste ba Guiné-Bisau ne’e iha ámbitu solidaridade ba aniversáriu Independénsia Guiné-Bisau ba dala-50, nune’e mós aniversáriu Forsa Armada Guine-Bisau nian, maske dook maibé nu’udar nasaun amigu ne’ebé hamutuk iha Komunidade Nasaun Lian Portugués (CPLP, sígla Portugués) sente hanesan ba uma rasik.
“Ami na’in rua Xefe Estadu Maior Jenerál F-FDTL, komandante Falur, ami na’in rua ba hanesan reprezenta Prezidensiál ho Governu, Estadu Timor-Leste nian, ami ba hatudu mós ita-nia solidaridade ba ita-nia país irmão ne’ebé mós uluk funu tinan 24, sira mós polítikamente apoiu ita, maibé ita bele dehan katak, ita estratéjika iha kampu polítiku diplomátiku”, Lere hatete.
Lere haktuir, lider sira ne’ebé daudauk ne’e iha, iha tempu rezisténsia liuhosi nasaun sira hanesan Guiné-Bisau, Ángola, Mosambike, tanba ne’e Timor-Leste konsidera nasaun hirak ne’e nu’udar país amigu ne’ebé presiza fó solidariedade, inklui nasaun amigu CPLP sira seluk.(*)
690 total views, 9 views today
Bele hare Video Seluk :
Subscribe to Timorpost
