ADVERTISEMENT

Mehi Jornalista, Sai Fali Funsiunáriu Públiku

Mario da Costa - Istilu Moris
Jornalista : Amélia Babo
Editor : Isabel Ermelita
  • Share
Candida Ramos da Silva. Foto TP/Esp

Díli (timorpost.com) – Feto isin mutin, fuuk been pinta mean, ne’ebé gosta hatais kalsa metan no faru metan, nia maka Candida Ramos da Silva, atuál funsiunáriu administrasaun iha Universidade Nasionál Timor Lorosa’e (UNTL), Fakuldade Siénsia Sosiais, Departamentu Komunikasaun Sosiál.

Candida bainhira sei ki’ik, sempre nonton televizaun iha uma, nia haree jornalista sira halo entrevista fonte sira, motiva mós nia hakarak saida jornalista altura ne’eba.

ADVERTISEMENT
SCROLL FILA BA NOTISIA


“Maibé, esforsu no hakarak ne’ebé ha’u iha, ikus la konsege sai jornalista, no sai fali funsionáriu públiku iha administrasaun iha UNTL, Fakuldade Siénsia Sosiais, Departamentu Komunikasaun Sosiál,” Ainaru oan ne’e konta kuandu dada lia ho Jornalista Timor Post, iha Kampus Merah Kaikoli, Kinta-feira (02/02).

”Uluk hau sei ki’ik, hau gosta sai reporter, tanba kalan-kalan iha uma hau haree iha televizaun, jornalista sira kaer kamera no hau hakarak sai hanesan ne’e, maibé iha impedimentu boot tanba iha okupasaun Indonesia, eskola kona-ba jornalismu nian iha Timor seidauk iha,” nia konta.

Entaun hafoin remata sekundáriu iha Ainaru, Candida deside mai Dili hodi kontinua ninia estudu iha universidade, altura ne’eba tama iha Universitas Timor-Timur (UNTIM-agora UNTL), nia eskola iha Politéknia Hera.

“Iha altura ne’ebá, ha’u ladún hatene fatin Politéknika Hera ne’e iha ne’ebé?, entaun ha’u nia maun maka lori ha’u ba Hera, no iha eskola ne’e iha deit departementu tolu, maka hanesan departamentu tékniku sipil, tékniku mesin, no tékniku eletróniku,” Kaben husi Armindo Soares, ne’e haktuir.

Nia sente laran susar tebes iha momentu ne’ebá, tanba departementu ne’ebé nia hakarak ne’e laiha, entaun nia duvida, hili area tolu ne’e ida, nia bele ka la’e?, maibé tanba laiha ona opsaun seluk,hakarak ka lakohi hili ida husi tolu ne’e, maka departementu tékniku eletrónika, tanba bainhira hakarak halo esforsu, fiar katak buat hotu sei la’o tuir ninia dalan no sei hatudu rezultadu pozitivu.

Lee Mós :
Banda Kraken Sei Aprezenta Múzika iha Mosambike

Fou-foun nia sente todan, tanba menus koñesimentu tebes ba departementu refere, maibé ikus mai bele remata ninia estudu ho diploma II iha area tékniku eletróniku nian, tanba halo esforsu makaas mesmu ke sente todan.

Mesmu ke la realiza ninia mehi pasadu nian, maibé nafatin agradese ba Maromak ba buat hotu ne’ebé nia hetan iha ninia moris liu husi esforsu lubun ne’ebé nia halo, ikus mai hetan servisu hanesan funsionáriu públiku, maski seidauk bele responde ba buat hotu, pelu menus bele responde ba nesesidade uma laran, selu oan sira nia eskola husi primária to’o universidade, nune’e mós haree ba lia mate no lia moris.

Portantu, moris iha mundu ne’e labele husik liu oportunidade ne’ebé iha, tenke aproveita buka aprende ho di’ak liu, maka sei lori benefísiu ba ema ida-idak nia moris.

“Ha’u iha prinsípiu ida, katak lalika husik hela buat ruma ba aban, bainhira ita rasik iha kapasidade atu bele halo, halo hotu agora,” Oan doben husi Leonito Silva (matebian) no Justina Ramos, ne’e katak.

Enkuantu, bainhira sei moris iha mundu ida ne’e, aproveita oportunidade, buka aprende buat ruma ne’ebé bele lori benefisíu ba moris iha futuru mai, labele husik liu oportunidade ne’ebé iha, tanba hirak ne’e sai hanesan bukae ida hodi prepara an di’ak liután para kompete iha futuru.

“Ha’u kontente maski inan-aman vida agrikultura, halo to’os no servisu hanesan badaen, susar atu hetan rendimentu kada loron, maibé sira sempre jere fundu ne’ebé sira iha hodi selu oan ami nia eskola no haree ba lia mate no lia moris,” Kazada ne’ebé moris iha loron 12 fulan Abril tinan 1975 ne’e haksolok.

Lee Mós :
FP Labele Abandona Servisu Iha Kampaña Elpar

No nia fó agradese ba inan-aman ninia esforsu tomak, hahú husi inisiu to’o akaba universidade, nufim sai ema susesu, ohin loron servisu nu’udar funsionáriu públiku, ida ne’e aleinde milagre no grasa husi Maromak, mós tanba inan-aman nia esforsu.

Portantu, Candida rasik, hahú ninia estudu iha eskola Primária Katólika Santa Maria, munisípiu Ainaru, iha tinan 1981-1987, Pre-sekundária Públiku, Ainaru, iha tinan 1987-1991, no Sekundária Katólika Santa Maria, Ainaru, iha tinan 1991-1993. Hafoin remata sekundáriu, feto isin mutin ne’e, deside mai iha Dili hodi kontinua ninia estudu iha nivel superior, iha Politéknika Hera, iha okupasaun Indonesia, iha departementu tékniku elektrónika, Diploma II, hahú iha tinan 1993-1995. Remata, nia ba tuir teste funsionáriu, depois halo voluntáriu iha Jakarta, Indonesia, iha tinan 1996-1998, depois nia fila mai Timor, servisu Administrasaun Munisipiu (PEMDA Tingkat II) Ermera to’o tinan 1999.

Hafoin tama fali iha ukun an, iha 2001, nia seidauk servisu, entaun deskansa iha uma, no iha tinan 2004, nia hetan servisu fali, iha Diresaun Estatístika, hanesan staff iha data entry, rekolla dadus sensus uma kain, durante fulan neen nia laran, depois hetan fali oportunidade seluk, servisu iha World Food Program (WFP), kontratadu hanesan staff ba data entry school feeding, kuaze fulan neen nia laran mós.

La para iha ne’e de’it, feto potensiál ne’e kontinua hetan oportunidade iha Sekretáriadu Tékniku Administrasaun Eleitorál (STAE), atende halo kartaun eleitorál iha munisípiu Ainaru, iha tinan 2006-2007.

Depois, Ainaru oan ne’e kontinua fali ninia estudu iha Universidade da Paz (UNPAZ), Fakuldade Tékniku, Departamentu Indústria, iha tinan 2008-2010. Hafoin remata, nia rona informasaun, katak Universidade Nasionál Timor-lorosa’e (UNTL) loke hela vaga ba funsionáriu públiku permanente, entaun nia mós koko konkorre iha vaga refere .

“Ha’u lori ba entrega dokumentu kompletu iha administrasaun UNTL nian, ikus mai ha’u nia naran sai iha fakuldade siénsia, departamentu komunikasaun sosiál, hanesan funsionáriu administrasaun iha departamentu refere, iha tinan 2014 mai to’o ohin loron,” Candida haktuir.

Lee Mós :
MCI-AIFAESA Halo Amostra ba Foos Rua

“Ha’u kontente servisu iha area administrasaun tanba bele aprende buat barak, liuliu area administrasaun hodi atende estudante sira, inklui aprende mós buat foun barak husi dosente fakuldade, liuliu departamentu komunikasaun sosiál nian,” Candida kontente.

No iha mós ninia servisu ne’ebé nia hala’o loron-loron, iha administrasaun fakuldade refere, maka atende estudante sira iha departamentu ne’e, husi semester ida to’o livre teoria, inklui estudante ne’ebé finaliza ona monografia, no mós halo estrutura departamentu refere, hahú husi dosente to’o estudante, inklui halo servisu relasiona ho administrasaun nian iha fakuldade refere.

Enkuantu, feto isin mutin ne’e, iha maun-alin hamutuk sira na’in-sia (9), maibé na’in- rua mate tiha ona, agora hela sira na’in- hitu, enkuantu Candida hanesan oan ikun.

Portantu, Candida ho nia fuan sorin Armindo Soares (estudante finalista iha Universidade Indonesia) livre ona teoria, hein de’it gradua, sira na’in rua iha oan na’in- haat. Oan feto boot ho naran Isabella Ramos da Silva Soares, idade 22, daudaun ne’e eskola iha Universidade Nasionál Timor-Lorosa’e (UNTL), Fakuldade Ekonomia, Departamentu Turizmu.

Enkuantu, oan daruak ho naran Leonivio Ramos da Silva, idade 19, agora eskola iha Dili Institute of Technology (DIT), Departamentu Petroleum Enjeñaria, no oan datoluk ho naran Carol Ramos da Silva Soares,idade 17, agora iha Universidade da Paz (UNPAZ), Departamentu Relasaun Internasionál, portantu oan ikun ho naran Armindo Junior Ramos da Silva, idade 14, sei iha sekundária.

 1,719 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Mehi Jornalista, Sai Fali Funsiunáriu Públiku” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No