DILI, (timorpost.com)—Ministru Defeza, Kontra-Almirante, Donaciano Costa Gomes ‘Pedro Klamar Fuik’, orgullu ho mudansa iha instituisaun Forsa Defeza Timor-Leste (FDTL) hafoin transforma husi Forsa Armada Libertasaun Nasionál Timor-Leste (FALINTIL) iha tinan 23 ba kotuk, ohin loron F-FDTL iha mudansa bo’ot.
“Diferensia boot, kuandu hahú transformasaun ba dala-23 iha tinan ida-ne’e, kuandu ita hatene uluk iha Aileu ita laiha fardamentu, ita laiha kilat, ita laiha uma, ita laiha kuartel jenerál, mais agora iha ona”, Kontra-Almirante Pedro Klamar Fuik, informa ba jornalista iha Ministériu Defeza, Kinta, (01/02).
Pedro Klamar Fuik hatete, iha ninia mandatu hanesan Ministru Defeza, nafatin kompromete ba forsa armda sira atu kontinua dezenvolve forsa armada ne’e sai forsa ida ne’ebé modernu no profesionál.
“Ita kompromete ba ita-nia forsa armada atu dezenvolve forsa armada sai forsa ida ne’ebé mak moderna, forsa ida ne’ebé mak profesionál”, Governante ne’e hatete.
Nia afirma, modellu dezenvolvimentu ne’ebé mak Timor-Leste hakarak halo no halo hamutuk ho rai amigu sira hanesan Austrália, Portugál, Indonézia, Xina, Amerika, Japaun, sira hotu-hotu fó apoiu para bele atinji mehi ida sai forsa ida ki’ik, no ho forsa efetivu tuir nesesidade povu no nasaun ida-ne’e nian.
“Ita-nia mehi sai forsa ida ki’ik, forsa ida ke efetivu, forsa ida proporsionál, tuir ita-nia kbi’it, tuir ita-nia jeografia, tuir ita-nia ema, ita bele alkansa ho programa hotu-hotu ne’ebé ita halo”, nia hakotu.(*)
1,593 total views, 3 views today
Bele hare Video Seluk :
Subscribe to Timorpost
