DILI (Timor Post) – Desizaun Governu liuhosi Konsellu Ministru (KM), ne’ebé realiza iha Palásiu Governu Kuarta (10/08) ne’e, aprova hasa’e saláriu porsentu 15 ba Polisia Nasionál Timor-Leste (PNTL).
“Ohin Konsellu Ministru aprova Dekretu-Lei daruak ho objetivu atu halo alterasaun ba rejime romunerasaun PNTL ninian,” dehan Ministru Prezidensiál Konsellu Ministru, Fidelis Magalhães, iha Palásiu Governu.
Nia dehan, iha alterasaun ba rejime romunerasaun PNTL, ida ne’e sei refleta kompromisu Estadu no Governu Daualuk ida ne’e ninian.
“Atu aumenta 15% ba remuneratóriu baze ba membru Polísia Nasionál Timor-Leste (PNTL), sira ninian, ne’ebé iha 2023 sei hasa’e saláriu báziku PNTL 15%,” hateten nia.
Nia hateten tan, tanba aktualizasaun ba rejime remuneratóriu ida ne’e mós refleta duni ba alterasaun orgánika Polísia Nasionál Timor-Leste nian.
La’ós ne’e de’it Konsellu Ministru mós aprova dekretu lei kona-ba estatutu profisionál ba pesoál ho funsaun polisiál sira la PNTL ninian.
Objetivu mak fó PNTL ho estatutu profisionál rasik ba pesoál PNTL sira ho perspetiva atu hasa’e prestasaun servisu ba sira ne’ebé servisu iha PNTL.
“Hasa’e kuandu mutivasional no sei kontribui ba aumenta autestima ba Polísia Nasionál Timor-Leste (PNTL), ninian,” nia subliña.
Enkantu dekretu lei rua ne’e aprezenta husi Primeiru Ministru, hanesan mós Ministru Interiór, Taur Matan Ruak, ho nia Vise Ministru Interiór, Antonio Armindo, hafoin membru Konsellu Ministru sira diskute no deside halo aprovasaun.
1,369 total views, 3 views today
