DILI, (timorpost.com)— Polísia Nasionál Timor-Leste (PNTL) liuhosi Departamentu Intevestigasaun Kriminal Nasioná(DIKN) alerta públiku ligadu ho osan falsu ne’ebé sirkula ona iha rai-laran.
Xefi Departamentu Investigasaun Kriminal Nasionál (DIKN), Superintendente Polísia, João Belo dos Reis, hato’o ba públiku kona-ba movimentu osan falsu ne’ebé daudauk ne’e sirkula ona iha Timor-Leste. Tanba ne’e, nia husu ba komunidade no populasaun hotu atu hatene no haree karik ema ruma uza osan falsu ne’ebé PNTL temi ona, bele kontaktu ba polísia eskuadra ne’ebé besik ou bele fó informa ba PNTL liuhosi númeru 77230194.
“Ami hakarak apela ba públiku katak, liga ba iha moviemntu osan falsu sira ne’e, iha indikasaun hanesan tuir mai, iha osan falsu 50 sentavus, ida ne’ebé orijinál nia koor di’ak no ida ne’ebé falsu nia koor metan uitoan no iha mós nia diferénsia iha nia liña sorin mai ne’e kasar liu no kompara ho ida ne’ebé orijinál, tanba ne’e husu komunidade banhira atu simu osan presiza haree didi’ak”, dehan Xefi Departamentu DIKN, Superintendente Polísia, João Belo do Reis, ba jornalista sira iha Komandu Jerál PNTL Kaikoli, Sesta, ( 01/03).
Nia hatutan, parte ida mós osan 50 sentavus ne’e hakerek iha kotuk, Repúblika Demokrátiku kompara ho osan falsu ne’e la hakerek asentu, ezemplu iha letra A ho letra U, ida-ne’e la uza asentu, tanba ne’e fásil atu komundade deteta iha ne’e, banhira ema ruma lori osan ba iha loja ka kios sira atu sosa buat ruma.
“Ami husu ba públiku tomak karik ema ruma lori osan ne’e ba kompras ou ema ruma lori osan ne’e sosa sasán ruma iha ita-nia bairru ka ita-nia kios halo favór informa imiadata ita bele loke prosesu no buka tuir autór sira ne’ebé mak lori osan ne’e halo sirkulasaun”, nia afirma.
Aleinde ne’e, parte polísia mós hetan ona keixa, sidadaun balun no mós parte banku balun mós fó ona informasaun ba polísia, tanba ne’e parte polísia hakarak alerta ba populasaun tomak atu hatene, maibé prosesu investigasaun la’o hela, ne’ebé na’in ida ka rua ne’ebé mai hato’o keixa atende ona no agora sei halo hela verifikasaun.
“Ita foti deklarasaun husi sidadaun sira ne’ebé hato’o keixa ne’e, hafoin ita bele hetan autór ne’ebé mak pordús loloos osan ne’e, tanba ne’e ami presiza tebes apoiu komunidade em jerál no maluk sira hotu iha teritóriu Timor-Leste laran tomak atu bele komunika ba polísia kuandu hetan osan ne’ebé mak ohin ami temi ne’e sirkula ita-nia bairru laran”,nia subliña.
Nune’e mós, parte PNTL komunika ba iha banku sira no polísia mós sei hola parte iha sosializasaun bele komunika ka ko’alia ho autoridade sira bele hatene kona-ba osan falsu ne’ebé sirkula iha nasaun rai-laran.(*)
3,141 total views, 3 views today
Bele hare Video Seluk :
Subscribe to Timorpost
