DILI (Timor Post)-Polísia Nasionál Timor-Leste (PNTL), liuhusi Unidade Patrullamentu Fronteira (UPF), ohin (13/07), halo kaptura ba sidadaun Timor oan feto nain-4, ne’ebé halo tranzasaun ilegál ba kombustivel iha area Mota-Ain fronteira entre Timor-Leste ho Indonézia.
Komandante Unidade Patrullamentu Fronteira (UPF), Superintendente Polisia, Euclides Belo, hatete PNTL liuhusi Servisu Seksaun Sekreta UPF, halo vizilansia no kontrolu iha area fronteira, konsege kaptura sidadaun timoroan feto nain-4, ne’ebe halo tranzasaun ilegál ba kombusivel iha area Mota-Ain fronteira entre Timor-Leste ho Indonezia.
“Atu informa iha oras tuku sia kalan ita-nia membru Servisu Sekreta halo kapturasaun ba ita-nia sidadaun feto nain-4, ne’ebé komete krime tranzasaun ilegál husi Atambua mai Timor-Leste ba konbustivel tipu Gazolina jerigen 20ltr hamutuk 29 no 5ltr iha 7, no sira halo kapturasaun iha area TCL 12 Suku Batugade”, Euclides Belo informa ba jornalista sira liuhusivia telefone, Kuarta (13/07).
Nia dehan, sidadaun nain-4 ne’e UPF halo ona identifikasaun no termu entrega ba iha Esquadra PNTL Batugade hodi halo prosesu kontinuasaun.
“Iha prosesu identifikasaun ne’e ita identifika sidadaun feto nain-4 ho inisial, CM tinan 50, husi Aldeia Lotan, Suku Leohitu maibe hela iha Mota-Ain, Suku Batugade, ALP, tinan 18, hosi Aldeia Leohitu, Suku Leohitu no hela iha Mota Ain. Enkuantu iha mós sidadaun feto nain rua ne’ebé halo kazamentu mista ho timoroan mak YMB, sidadaun Indonézia, tinan 31 hosi Suku Dolaus, Atambua-NTT, no AV sidadaun Indonézia, tinan 31 husi Suku Salore, Atambua-NTT”, Nian relata.
Euclides hatete, nia parte entrega ona sidadaun sira hamutuk ho evidensia ba Komandu Esquadra PNTL Batugade hodi kontinua ba prosesu investigasaun no sei prosesa tuir lei ne’ebé vigor iha Timor-Leste.
1,056 total views, 3 views today
