DILI (Timor Post) – Komandu Polisia Nasional Timor Leste (PNTL) Munisípiu Dili, Orienta ona Operasaun Polísia Suku (OPS) no intelijénsia sira, atu buka tuir autór nain-tolu ne’ebé sona vítima ho naran inisal EFP iha luru-mata foin lalais ne’e.
Tuir Segundu Komadante PNTL Munisípiu Dili, João Sancho Pires, hatete kazu ne’ebé akontese iha area Luru- mata iha loron Sábadu (06/08), mais ou menus 01:00 madrugada, ema Deskoñesidu nain-tolu uza motor Revo ida kor metal no laiha xapa matríkula, sona vitima EFP iha nia rezidénsia, banhira nia sai husi uma laran, atu soe foer.
Nia haktuir, ema Deskoñesidu ne’e sona vítima EFP iha nia kelilin okos parte liman los, nune’e Vítima konsege ko’alia ho nia família sira hodi evakua ba iha Hospital Nasionál Guido Valadares (HNGV) hodi halo tratamentu.
“Ema nain-3 ne’ebé deskoñesidu sona vítima EFP, ita sei buka tuir hela, ita orienta tiha ona intelijénsia, OPS no parte hotu-hotu para buka tuir hela ema ne’ebé kria hela problema iha Dili laran,” dehan nia iha knaar fatin Kaikoli, Segunda (08/08).
Nia haforsa liu tan, sira-nia parte orienta nafatin parte investigasaun no OPS sira hotu atu buka tuir no iha tempu ida sei kaer autór sira ne’e.
“Daudaun ne’e, atuasaun polisia nian la’o hela, ita oriena kedas eskuadra Dom Aleixo parte investigasaun hodi ba foti dadus vítima nian, hodi nune’e prosesu kazu ne’e ba iha Ministériu Públiku,” nia hakotu.
1,628 total views, 3 views today
Bele hare Video Seluk :