DILI (timorpost.com)—Relasiona ho kazu ne’ebé komete husi membru FALINTIL Forsa Defeza Timor-Leste (F-FDTL), iha Kuarta (16/08/2023) tiru sidadaun ida ho idade 15, iha suku Dato, Postu Administrativu Likisá Vila, Munisípiu Likisá, daudaun ne’e asegura ona iha Postu Polisia Militár (PM) hodi submete ba prosesu investigasaun.
“Kazu tiru labarik Likisá ne’e, akuzadu seidauk kulpadu no justisa, akuzadu iha hela prizaun,” Xefe Estadu Maior F-FDTL, Tenente Jenerál Falur Rate Laek, informa, ba Jornalista iha edifísiu PM Kintál Boot, Kinta (14/09/2023).
Major Jenerál ne’e haktuir, agora hein prosesu investigasaun tuir lei ne’ebé mak vigor iha nasaun Repúblika Demokrátika ne’e.
“Tuir prosesu dixiplinár bainhira aktu refere gravida ba krime tenke haruka suspeitu ba sivíl. Agora sei asegura hela hein desizaun fó sai hosi tribunal”.
Tenente Jenerál, Falur Rate Laek esplika, buat hotu depende ba desizaun tribunal karik mandadu haruka dezarma ou hasai foin nia sai, ne’e mak formaliza, ne’e mak bolu justisa, tuir prosesu dixiplinár to’o konkluzaun nia sala ka la sala, hetan kastigu la kastigu mak nia sai.
“Karik desizaun krime grave sei kastigu suspeitu, foin bele hasai, agora sei iha detensaun nia laran”. Hakotu.
989 total views, 6 views today
