Dili (Timor Post)—Komandu Polisia Nasionál Timor Leste (PNTL) Munisípiu Dili realiza enkontru ho Komandante Eskuadra sira, hodi halo aprezentasaun Planu anuál Munisípiu Dili ba tinan 2023, liuliu infraestrutura sira.
Komandante PNTL munisípiu Dili, Superintendente Xefe Polisia Henrique da Costa, hatete ohin komandu Munisípiu Dili realiza enkontru ho komandante eskuadra sira, komandante xefe seksaun sira hodi prepara planu asaun anuál ba tinan 2023 nian.
“Iha planu annual tinan 2023 ita foka ba infraestrutura nian, ita presiza hare kona ba edifísiu ba iha komandu Munisípiu nian no mós eskuadra sira, ita mós hare reabilitasaun ba iha fatin balun ne’ebe mak utiliza husi públiku hanesan hariis fatin,” dehan nia ba Jornalista Sira iha nia knaar fatin Kaikoli Dili, Kinta (30/06/2022).
Nia dehan, hare mós kona-ba programa polisiamentu komunitaria nian sei halo atividade barak iha komunidade, no mós halao atividade prevensaun ba krime nian, para atu nune’e envolve hotu apoiu polisia hodi prevene krime akontese iha munisípiu Dili nian.
“Tanba ita hatene semana oin komandu jerál prepara atividade planu asaun anuál nian entaun ita komandu Munisípiu Dili ita tenke prepara mós ita nian atu nune’e bainhira halo aprezentasaun ne’e laos dehan buat ne’ebe mak komandu Munisípiu Dili mak deside, maibé hetan mós hanoin husi ita nia komandante eskuadra sira no mós xefe seksaun sira, atu nune’e buat ne’ebe mak lori ba ne’e bele hetan duni, no sira ne’ebe mak sira hetan iha terrenu ita lori ba aprezenta,” dehan nia.
Enkuantu komandu Dili sei kontinua realiza enkontru, maibé depois ida ne’e parte komandu sei akumula ba iha formatu, para atu nune’e bainhira enkontru nasionál lori ba aprezenta.
Aleinde ne’e nia parte hatete, parte importante ida mós kontinua halao nafatin atividade vizita ba eskola, depois ba kampus kontinua programa ne’ebe mak antes ne’e halao ona iha tinan kotuk no mós tinan ida ne’e, nune’e sei realiza tan tinan oin.
“Programa ba eskola, ita haree liu kona ba iha kódigu penal nian, Sinai’s tránzitu no mós polisia komunitaria nian, ita iha ekipa ne’ebe mak preparadu, ba halo sosializasaun programa vizita ba eskola sira,”
Iha enkontru Planu anuál ba tinan 2023 ne’e, Komandante Polisia nasionál Timor Leste (PNTL), Munisípiu Dili Superintendente Xefe Polisia Henrique da Costa halo abertura no akompaña mós husi segundu Komandante PNTL Munisípiu Dili, Superintendente Polisia Joao Sancho Pires. Hakotu nia.
2,468 total views, 3 views today
Bele hare Video Seluk :