Dili, Timor-Leste – 10 Juñu 2024 – Gabinete Kooperasaun Defeza (ODC) kontente anunsia inísiu husi Ezersisiu Dalan ba Dame 2024, esforsu kolaborativu ida entre Ezérsitu Estadus Unidus nia Komando Pasífiku (USARPAC) no FALINTIL-Forsa Defeza Timor-Leste (F-FDTL).
F-FDTL nia Tenente Jenerál Falur Rate Laek, Xefe Estadu Maiór Jenerál, Embaixada Estadus Unidus nia Enkarregadu Negosiu Weinstock, USARPAC nia Vise-Komandante Brigadeiru Jenerál Okamura, no soldadu sira husi nasaun rua ne’e halibur hamutuk hodi loke eventu importante ida-ne’e.
Ezersisiu ne’e estabelesidu hodi promove interoperabilidade tátika, hasa’e prontidaun no kredibilidade ne’ebé mak importante tebes ba manutensaun pás iha rejiaun. Ho partisipantes liu nain 250 husi tantu Estadus Unidus no Timor-Leste ne’ebé envolve iha treinu kompreensivu kona-ba táktika, téknika no prosedimentu sira iha nível ekipa no pelotaun, inisiativa ne’e inkorpora espíritu kolaborativu no promove pás no seguransa iha rejiaun ida-ne’e.
Iha ninia diskursu iha serimónia abertura, Enkarregadu Negósiu Marc Weinstock fó énfaze ba importánsia parseria entre Estadus Unidus Amérika no Timor-Leste.
Nia hatete: “Bainhira ita hahú ezersísiu konjuntu ida-ne’e, mai ita rekoñese kontestu ida-ne’ebé luan liu iha ita-nia parseria, katak indo-Pasífiku ida-ne’ebé livre no nakloke, hodi asegura nasaun hotu nia prosperidade no seguransa.” Nia subliña importánsia atu fortalese kolaborasaun, ho dehan: “Liuhusi fortalese ita-nia kooperasaun no interoperabilidade, ita la’ós de’it hasa’e ita-nia kapasidade defeza koletiva, maibé mós haruka mensajen klaru kona-ba prinsípiu liberdade, abertura no respeitu ba direitu internasionál.” Weinstock nia liafuan hirak-ne’e fó énfaze ba misaun prinsipál husi Ezersísiu Dalan ba Dame 2024, subliña kona-ba kompromisu ne’ebé nasaun rua fahe ba malu kona-ba pás, seguransa no prosperidade rejionál.
Treinu ne’e, sei hala’o to’o fulan Juñu nia rohan, foka liu ba soldadu sira-nia abilidade fundamentál hirak hanesan tátikas iha unidade ki’ik, navegasaun rai-maran, atendimentu tátiku ba vítima sira iha kombate, no enjeñaria kombate. Partisipante sira inklui membru militár sira husi Forsa Ezérsitu Estadus Unidus Amérika, Guarda Nasionál Rhode Island, no F-FDTL nia Kompañia B Batallaun Súl.
519 total views, 15 views today
Bele hare Video Seluk :
Subscribe to Timorpost
