Dili (Timor Post) – Estadus Unidus Amérika (EUA), Kinta (18/08), liuhusi ajénsia Estadus Unidus ba Dezenvolvimentu International (USAID), anunsia finansiamentu adisional 600, 000 USD, hodi finansia USAID nia atividade ba sustentabilidade sistema Saúde hodi apoiu luta hasoru covid-19 iha Timor-Leste, no total fundu atuál ba apoiu Timor-Leste kombate covid-19 hamutuk liu 7.4 USD.
“Ami kontente tebes hodi halo kooperasaun ho Ministériu Saúde atu Reforsa sistema Saúde iha Timor-Leste liuhusi kontribuisaun foun ho montante 600,000 USD ne’e hanesan adisional Ministériu Saúde reforsa liután sistema saúde iha Timor Leste”, Embaixadór EUA iha Timor-Leste, Tom Daley, hateten iha Palásiu da Sinzas, Kaikoli, Kinta (18/08).
Nia dehan, Osan adisional ne’e sei aloka ba atividade no mós inisiativa hodi habelar fó informasaun ema hirak ne’ebé sei duvida hela ho covid-19. No osan sira ne’e sei utiliza atu habelar informasaun ba sira hodi konvensa atu bele simu vasinasaun ba covid-19 hodi kombate covid-19.
“Estadus Unidus kontente atu oferese tan apoiu ba covid-19 hodi kombate pandemia ne’e no hametin Seguransa Saúde, nune’e ami fó parabéns ba progresu ne’ebé Timor-Leste hetan ona to’o oras ne’e iha kombate hasoru pandemia ne’e, apoiu ohin loron nian bazeia ba progresu ne’e, atu haluan tan kobertura vasinasaun ba area balun ne’ebé remota liu iha Nasaun ne’e, liuhusi kampaña sensibilizasaun espesifika ba sira ne’ebé seidauk bele simu vasina covid-19”, nia hateten.
Iha fatin hanesan Ministra Saúde, Odete Freitas Belo, dehan hakarak atu hato’o katak apoiu sira hanesan ne’e la’ós apoiu ida ne’ebé primeira vés, maibé apoiu husi parseiru oi-oin no doadór oi-oin, tanba ne’e maka ohin apoiu seluk husi Governu Amérika liuhusi USAID nian ne’ebé sira apoiu ho osan adisional ho montante 600,000 USD.
“Tanba ne’e Ministériu Saúde apresia apoiu husi USAID, nia ne’e tanba sei reforsa servisu pesoál saúde sira iha munisípiu hotu inklui RAEOA hodi responde ba pandemia Covid-19 no hasae partisipasaun komunidade sira nian iha kampaña vasina covi-19.
Nia dehan, dezde pandemia ne’e hahú Estadus Unidus Amérika serbisu hamutuk ho Governu Timor leste hodi forneses liu millaun 7.4 USD iha asisténsia kritika atu kombate covid-19 inklui vasina pfizer liu 200, 000. Estadus Unidus agora dadaun halo hela abordojente ida hodi prepara pandemia nee iha mundu tomak, hodi hamenus impaktu husi covid-19 ba ema hotu, sosiedade no hametin rekuperasaun global.
1,870 total views, 3 views today
