DILI, (timorpost.com)—Konsellu Imprensa (KI) Timor-Leste servisu hamutuk ho parseiru Australian Broadcasting Corporation International Development (ABCID) lansa livru Matadalan Jornalizmu inkluzivu.
“Livru ida ne’e, ikus mai ita lansa, tanba iha kooperasaun ho ABCID no mós ita uza tempu naruk hodi halo peskiza ida ba konteúdu ne’ebé relasiona ho asuntu inkluzivu, hanesan ita hatene KI nu’udar órgaun regulador ida, maibé nia iha kompeténsia atu eleva kapasidade jornalizmu nian,” dehan Prezidente Konsellu Imprensa, Otelio Otel ba jornalista sira iha ámbitu lansamentu Livru Matadalan Jornalizmu Inkluzivu iha Suai Room Timor Plaza, Tersa (16/04).
Prezidente Konsellu ne’e mós hatete, Livru matadalan ida ne’e, util tebes ba jornalista sira hela iha territóriu laran, tanba hotu-hotu hatene katak tinan barak nia laran, Jornalista barak halo tiha ona pratika jornalistika, no halo tiha produtu jurnalistiku, maibé barak mak seidauk intende kona-ba oinsá halo reportajen ka produtu notísia sira ho inkluzivu.
“Tan ne’e, livru ida ne’e sei guia jornalista sira atu oinsá ita produz notísia sira loron-loron, involve ema grupu sosiál hotu, involve ema hotu iha publikasaun sira, ida ne’e bolu kontribui makas ba sosiedade ida ne’ebé metin no sosiedade ida ne’ebé inkluzivu no sosiedade ida ne’ebé sente an hanesan ita Repúblika Demokrátika de Timor-Leste,” nia akresenta.
Prezidente KI nian esperansa katak, livru matadalan ida ne’e, jornalista no jestór media sira sei uza iha prosesu kobertura, no prosesu halo produsaun notísia no halo publikasaun.
“Ha’u hein katak, jornalista sira hotu no jestór media sira bele uza matadalan ida ne’e ho didi’ak, para atu bele guia ita boot sira prosesu halo kobertura no mós prosesu editing notísia no mós ba too iha prosesu ba publika notísia ba publika, tanba ita tenke sensivel tebe-tebes ho sosiedade ida ne’e, bainhira ita la inklui ema hotu iha ita nia publikasaun, signifika ita halo diskriminasaun, bainhira ita halo publikasaun ho konteúdu ida ne’ebé lala’o tuir sira termus signifika ita diskrimina ema no ita tau ema seluk iha risku nia laran,” nia afirma.
Iha fatin hanesan, Diretór Australian Broadcasting Corporation International Development ( ABCID) Timor-Leste, Aaron Kearney hatete, sira apoiu KI, liuhusi matadalan sira ne’ebé jornalista sira atu uza hodi produz prosesu notísia nian no seluk-seluk tan.
“Ha’u hanoin matadalan ida ne’e atu ajuda Konsellu Imprensa Timor-Leste, atu promove nia Vizaun no Misaun, hodi hakle’an media nia komprendesaun kona ba Timor-Leste, no hakabit jornalista sira atu halo entrevista no hato’o ema sira nian istória esperiénsia moris nian,” katak nia.
Direitu ABCID Timor-Leste hatete, matadalan ne’e, importante tebes, katak feto sira, ema ho defisiénsia sira no ema sira husi komunidade, no ema sira husi relijiaun no rasa sira ne’ebé monetária iha Timor-Leste, reprezenta liuhusi media, hodi kria media ne’ebé los liuhusi mundu ne’ebé hela ba.
“Ami enkoraja media sira atu uza matadalan ne’ebé ohin halo ona lansamentu, atu nune’e bele ajuda media sira liuhusi sira servisu loron-loron nian, hanesan halo kobertura, produsaun notísia too iha públiku notísia ba iha públiku sira,” nia subliña.
1,794 total views, 3 views today
Bele hare Video Seluk :