DILI, (timorpost.com)— Ekipa Ministériu Komérsiu Indústria (MKI) hamutuk ho Empreza Heineken, Gabinete Prezidente inklui Sekretáriu Estadu Igualdade (SEI) halo reuniaun ho Prezidente Repúblika Jose Ramos Horta liga ba oinsá atu kapasita inan feto iha kulinária.
Vise Ministru Komérsiu Indústria (MKI), Augusto Junior hatete, ohin ekipa hasoru Prezidente Repúblika atu relata de’it atividade balun, ne’ebé sira halo, oinsá atu kapasita feto iha kulinária.
“Xefe Estadu fó mensajen atu kontinua inisiativa ida ne’e, tanba di’ak tebes, mais tenke hare katak oinsá inan feto sira atende konsumidora sira ho moos, no atende ema ho di’ak,” Nia dehan ba jornalista sira hafoin remata enkontru ho Prezidente Repúblika iha Palacio Prezidensiál Bairu-Pite, Kuarta (17/04).
Nia dehan, servisu ne’e fó liu ba orientasaun para oinsá atu halibur inan feto sira ne’ebé iha abilidade ba kontinua te’in iha restaurante sira nune’e mós presiza formasaun ba sira. Ho ida ne’e mak sira mai hato’o ba Prezidente Repúblika.
“Timor ne’e poténsia ba bisnis barak, presiza mak formasaun hodi kapasidade abilidade ne’ebé iha feton sira iha. Timor la’ós ema ne’ebé gosta tane lima ba husu ema, maibé sira halo negósiu ruma hafoin hetan osan, signifika halo esforsu ne’ebé iha, Prezidente Repúblika hare katak ida ne’e sai hanesan lisaun boot ida tebes ba rai ida ne’e, no kompara ho rai seluk ne’ebé agora lao hela”. Nia haktuir.
Iha fatin hanesan Diretór ezekutiva Asuntu Kooperativa, Samantha Sequeira, hatete husi programa ida ne’e, sira sente importante tebes, atu ajuda inan no feto sira iha nasaun Timor-Leste ida ne’e, liu-liu kona-ba hahán nian.
“Ita espera katak programa ida ne’e, sei iha sustentabilidade no kontabilidade, tanba ita hare impaktu boot tebes ba nasaun, liu-liu iha ai-han Timor nian, ne’ebé mak ita hare iha Timor,” nia dehan.
1,152 total views, 3 views today
Bele hare Video Seluk :