DILI, (timorpost.com) — Diretór Asosiasaun Enjinaria Petróleu Timor-Leste (AEP-TL), Noventino Fernandes, hatete lider polítiku sira lori povu nia naran hodi benefísia-an ho osan estadu nian ba kada deputadu kuaze rihun $5 ($5.000) to’o besik rihun $8 ($8.000) kada fulan ne’e injustisa bo’ot ba povu ki’ik.
“Ha’u haree kuaze tinan 24 ita ukun-an, ita povu ne’e sei moris ki’ak, joven sira laiha kampu traballu, investimentu menus, prioridade saúde, edukasaun, agrikultura nafatin hakdasak, mais polítiku sira aproveita povu, lori povu nia-naran ba tuur iha orgaun Estadu, simu saláriu ho previléizu, kada fulan ida bele hetan osan entre $5.000 USD até besik $8,000 USD, ne’e in-justisa boot ba povu”, Diretór AEP-TL, Noventino Fernandes, hato’o ba Timor Post iha nia kna’ar fatin servisu edifísiu AEP-TL Taibesi, Domingu, (26/11/2023).
Nia hatutan, orsamentu estadu ne’ebé kada fulan gasta ba órgaun estadu hanesan Prezidénsia Repúblika, Parlamentu Nasioná, Governu no parte Justisa bo’ot liu duke ba povu, tanba ne’e mehi ida liberta povu husi ki’ak no mukit ba moris dígnu ne’e susar atu atinji. Tinan-tinan ba debate orsamentu, orgaun estadu sira sempre temi povu nia osan, iha tempu kampaña halo promesa barak ba povu atu hadi’ak povu nia moris, maibé realidade ukun tiha promesa sira ho komprimísiu ba herois sira lakon iha sira-nia fuan.
“Labele uza povu ne’e hanesan imi-nia instrumentu polítiku, atu atinje de’it imi-nia mehi ukun no goza osan estadu nian, povu barak sei tanis, servisu laiha, tinan-tinan debate fásil temi povu nia osan, kampaña halo promesa barak ba povu, hatuur erois sira-nia mehi atu liberta povu, mais realidade ukun hotu povu nafatin terus”, nia hatete.
Tanba ne’e, problema no injustisa bo’ot ne’ebé mosu iha órgaun estadu nian mak goza previléizu ho saláriu bo’ot halo ukun-nain sira haluha-an, liuliu iha Parlamentu Nasionál ne’ebé povu hili iha eleisaun parlamentár.
Noventino hatete, “Ita haree hamutuk osan subsídiu ba deputadu-deputada sira ne’ebé foin aprova daudauk ne’e, osan ba transporte kada ema ida fulan ida sei simu $1.600 USD, osan ba saúde nian kada ema ida fulan ida sei simu $600 USD, saláriu $2.000 USD ba leten, osan pensaun vitalísia (ba eis deputadu sira) kada fulan $1.500 USD”.
Aleinde ne’e, seidauk sura tan osan kada fulan ba pulsa eletrisidade, pulsa komunikasaun, osan ba alojamentu ka aluga uma, maske uma rasik iha hela, osan perdiem iha rai-laran no ba rai-liur, ne’ebé totál osan ne’ebé sira simu kada fulan besik $10,000 USD.
Osan ba saúde kada deputadu $600 USD, durante tinan ida hamutuk $7.200USD, no ba deputadu na’in ida durante tinan lima hamutuk $36.000USD. Kada deputadu ida hetan $36.000USD durante tinan lima, nune’e deputadu 65 durante tinan lima mak totál orsamentu gastu bele liu millaun rua ($2.340.000USD).
Enkuantu osan ba Transporte Deputadu sira, ema ida simu kada fulan $1.600USD, durante tinan ida $19.200USD. Kada tinan ba deputadu ida $19.200USD, durante tinan lima deputadu ida bele hetan hamutuk $96.000USD. Kada deputadu ida hetan $96.000USD durante tinan lima, nune’e deputadu 65 durante tinan lima mak totál orsamentu gastu bele liu millaun neen resin ($6.240.000.USD).
Saláriu ba deputadu-deputada sira kada fulan simu liu 2.000USD, durante tinan ida totál $24.000USD. Kada tinan ba deputadu ida $24.000USD, durante tinan lima deputadu ida bele hetan hamutuk $120.000USD. Kada deputadu ida hetan $120.000USD durante tinan lima, nune’e deputadu 65 durante tinan lima mak totál orsamentu gastu bele liu millaun 7 resin ($7.800.000USD).
Osan Pensaun Vitalísia ba eis deputadu sira kada fulan ema ida sei simu hahú husi purseuntu 60 (60%) husi saláriu $2.000USD ne’e to’o 90% signifika kada fulan eis deputadu/a ida sei simu hahú husi $1.500USD durante tinan ida gasta $18.000USD kada eisdeputadu.
Husi $18.000USD durante tinan lima kada deputadu ida sei hetan $90.000USD, nune’e estadu gasta osan bo’ot hodi selu no subsidia de’it ba titulár no eis titulár sira.
“Previléizu sira seluk ne’ebé reprezentante povu hetan hanesan osan sosa pulsa eletrisidade kada fulan, pulsa komunikasaun kada fulan, osan ba alojamentu ka aluga uma maske uma rasik iha hela, seidauk sura osan perdiam ba rai laran no rai liur, imajina ita bele harii eskola hira? Ita bele halo ponte hira? Ita bele halo estrada Kilometru hira? ita bele harii postu saúde hira? Ba povu konta mandatu tinan 5 ba periodu ida, ita bele rezolve buat barak”, Noventino kestiona.
Nia dehan, ida-ne’e foin iha orgaun Parlamentár, enkuantu orgaun Prezidensiál, orgaun Governu no orgaun Judisiáriu, ne’ebé maka hetan mós saláriu vensementu liu $3.000USD to’o $6.000.USD, mak estadu ida-ne’e kada tinan gasta de’it osan millaun ba millaun hodi finansia de’it órgaun estadu sira.(*)
2,507 total views, 3 views today
Bele hare Video Seluk :
Subscribe to Timorpost
