DILI (timorpost.com) – Relasiona ho Jogu Futeból Kopa Mundiál 2022, hafoin Portugal hetan golu rua, halakon Uruguai, adeptus iha Timor-Leste ho bandeira Portugal uza motor no karreta halo komboiu balun la kumpre lei kódigu estrada nian, PNTL prende motorizada hamutuk 34 no karreta ida iha area Jurídiku Munisípiu Dili.
Portavós Komandu Jerál PNTL, Superintendente Xefi Arnaldo Araújo, hatete jogu futeból Kopa Mundiál entre nasaun Portugal ho Uruguai, tanba ne’e adeptus barak husi Portugal halo pawai uza motor ho karreta la kumpre regra lei kódigu estrada nian, tanba ne’e tránzitu Munisípiu konsege prende transporte balun.
“Ita ohin prende adeptus Portugal nia transporte hamutuk 35 no kareta ida la lori karta kondusaun ho motorizada sira uza kanu resin, tula malu la uza kapasete inklui balun la monta asesores motor nian ne’e mak polisia halo check Point Prende hodi aplika koima ba sira,” nia hateten iha Kuartél Jerál PNTL Kaikoli, Tersa (29/11).
Nia dehan, karreta no motor ne’ebé PNTL prende sei aplika koima ba sira atu kumpre selu iha banku hafoin sira bele foti hikas sira-nia motor ho karreta iha Komandu PNTL Munisípiu Dili.
“Sidadaun sira uza transporte karreta no motor tenke kumpre regra, monta asesores transporte kompletu keta haluha uza kapatese no lori dokumentu kompletu mak halo viajen, maibé la kumpre mak ita nafatin implementa lei kódigu estrada halo atuasuan ba sira,” hakotu nia.
Entretantu Diretór Fundasaun Mahein (FM), Abel Amaral, hatete Ligadu ho Jogu Futeból Kopa Mundiál ne’ebé realiza iha Qatar, iha Timor la’ós foin dahuluk mak haree, maibé kuaze períodu ema fanátiku haree joga Mundiál, tanba ne’e kolega sira hotu fens A to’o Z, bele fens, maibé moris iha nasaun ida iha regras tenke kumpre.
“Sidadaun sira ne’ebé utiliza karreta ho motor, la tuir regras Tránzitu Rodaviaria nian, ami hanoin PNTL iha autorizasaun tomak atu halo intervensaun, tanba mesmu ita fens iha nasaun balun, maibé regras iha Timor ne’e, moris iha Timor regras nafatin kesi ita,” hateten nia.
Nia afirma, bainhira sidadaun ida viola regra Tránzitu Rodaviera nian, PNTL iha autoridade tomak halo intervensaun no halo aprensaun no kapturasaun, tanba viola ona regra lei kódigu estrada.
Nia dehan, adeptu se de’it, kontra regras Tránzitu Rodaviaria, Polisia iha autoridade tomak halo apreensaun no halo intervensaun no mós halo kapturasaun.
1,353 total views, 3 views today
Bele hare Video Seluk :