(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post) – Sentru Nasionál Chega (CNC-Sigla Portugés), ohin asina akordu servisu hamutuk ho Casa Produsaun Audiovisual (CPA), Atu Dezenvolve Video Kartún Chega Popular.
Diretór Ezekutivu Centro Nasionál Chega (CNC), Hugo Maria Fernandes, hatete, projetu kona-ba Dezenvolve Video Kartún Chega Popular, nu’udar parte ida hosi rekomendasaun iha relatóriu Chega nian ba iha area Edukasaun.
“Ami halo ida ne’e, husi programa Edukasaun formal ho Ministériu Edukasaun, nune’e mós ami buka Parseira sira ne’ebé mak bele apoiu CNC, liu-liu apoiu Governu nia programa, hodi halo fasil relatóriu Chega ne’e atu ema bele hatene”, nia dehan hafoin remata asina akordu servisu hamutuk ho Casa Produsaun Audiovisual (CPA), iha Edifísiu Centro Chega Antigo Komarka Balidi, Segunda (16/05).
Nia hatete, liu husi parseira CPA fiar katak, produsaun vizuál liu husi audio ho filmajen Kartún bele tulun tebes estudante sira liu-liu sira ne’ebé mak iha eskola Primária no Sekundária, dala ruma mós Universidade sira hodi hatene loloos saida maka relatóriu Chega nia konteúdu.
Programa ida ne’e nu’udar projetu ida oinsá mak atu fornese informasaun ba públiku liu-liu ba estudante sira iha eskola Primária, Sekundária no mós públiku em jerál, kona-ba konteúdu relatóriu Chega nian.
“Ami hanoin katak, importante mós liu husi produsaun iha relatóriu ne’e iha versaun Kartún liu-liu ba konsumu estudante sira nian, ne’ebé mak dala ruma relatóriu Chega nian todan liu atu lee, iha versaun ne’ebé mak nakonu iha livru ne’e, entaun versaun popular, ida mak transformasaun husi livru ba fali versaun Video atu nune’e, ita nia alin sira no mós públiku em jerál bele entende diak liu tan saida maka konteúdu relatóriu Chega nian,” nia relata.
Entretantu, Diretór Ezekutivu CPA, Rui Muakandala, haktuir, projetu ne’e sira hala’o tiha ona no iha fulan rua ou tolu tan finaliza no bele entrega ona ba CNC.
“Entaun ami nia serbisu komesa tiha ona, husi hakerek, no livru ne’ebé fornese husi CNC, nune’e mós iha fulan rua ou tolu hanesan ne’e, ami bele termina ona ami nia rezultadu iha CNC,” nia dehan.
Nia espera katak programa ne’e bele kria sosiedade ne’ebé mak armonia, no respeitu diretu Umanu. (Lee Notísia Seluk Iha Jornál Timor Post/ Asesu You Tube Timor Post)
660 total views, 3 views today
Bele hare Video Seluk :