Dili(timorpost.com)—Avansadu husi Klube Promovidu Emmanuel Fc, Edit Savio, hatudu nia performa di’ak hodi lidera provizóriu mellor markadór, ba Liga Futeból Timor-Leste (LFTL), primeiru divizaun.
Jogadór avansadu ho númeru kamizola (10), konsege hatudu duni nia produtividade hanesan jogadór avansadu, komesa hosi jogu daruak nian to’o agora tama ona jogu dalimak, nune’e nia konsege hatama golu tolu durante jogu tolu ikus ne’e.
Mane isin mutin mestisu husi munisípiu Lautem ne’e, la’ós foin mak ema koñese, maibé adeptu futeból Timor laran tomak kuaze koñese, avansadu refere, tanba iha tinan 2017 nia konsege sai uluk ona hanesan melor markadór ba iha kompetisaun Liga Amadora ne’ebé agora nakfilak ona ba Liga Timorense.
Iha ne’ebé nia hetan oportunidade iha momentu ne’ebá hetan kedas suporta hosi kompañia Heineken Timor-Leste, nune’e lori kedas nia ba hasoru jogadór estrela mundiál Ronaldino hosi Brazil iha Malaysia, iha tinan 2017 liubá.
Fó hanoin fali katak, Avansadu Edit Savio hahú nia karreira kompete iha liga ne’e husi klube Aitana Fc, nune’e reforsa fali Boavista de Timor no mós ba reforsa ekipa Assalam Fc, agora ba reforsa fali ekipa promovidu hosi segundu divizaun Emmanuel Fc iha tinan 2023 ne’e.
Enkuantu daudaun ne’e Edit Savio, lidera provizóriu iha tabela klasifikasaun hanesan melor markadór ba divizaun dahuluk Liga Timorense, ho golu tolu hanesan mós ho jogadór avansadu estranjeiru husi Portu Taibesi Fc, Yohanes Jehaman.
Ho golu tolu ne’ebé mak nia halo ne’e la fó benefísiu de’it ba nia-an rasik hanesan jogadór ne’ebé produtividade liu iha tinan ida ne’e, maibé lori mós nia ekipa okupa iha tabela klasifikasaun dahaat ho Pontus (6), husi rezultadu jogu haat.
Tuir lista melor markadór provizóriu Liga Timorense primeiru divizaun époka 2023 ne’e, hamutuk lima mak hanesan, jogadór avansadu Edit Savio hosi klube Emmanuel Fc golu, Yohanes Jehaman hosi Portu Taibesi golu (3), Hasan Ramos hosi Assalam Fc golu rua, hanesan ho Edencio da Costa husi Portu Taibesi no Juvinal Boavida hosi Akadémika Fc.
433 total views, 6 views today
