Timor Post (12/06/2020)- Primeiru Ministru Taur Matan Ruak, iha serimónia fó pose ba Prezidente Autoridade Rejiaun Administrative Espesiál Oekuse-Ambeno (RAEOA) Arsénio Paixão Bano, la haluha hato’o ninia agradesimentu ba prezidente sesante José Luis Guterres ‘Lugu’ ne’ebé fó ninia kontribuisaun durante mandatu fulan 7 nia laran.
“Ohin aproveita oportunidade ha’u hakarak fó agradese boot saudasoens espesiál no agradesimentu boot ba José Luis Guterres, nia assume kna’ar iha momentu kontra polítika iha ita nia rai, la’ós de’it ida ne’e ho mós Covid-19 ne’ebé mosu iha ita nia rai ba afeta ita nia populasaun sira. Nia esforsu tomak, ba kria nia ekipa para bele tuir nia kondisaun kapasidade posibilidade para bele fó ninia kontribuisaun, infelizmente nia mandatu termina maibé nia husik hela mós ninia kontribuisaun ida. Tanba ne’e ha’u pesoalmente hanesan primeiru ministru, ha’u hakarak fó agradese nia ho nia ekipa inklui nia família tomak”, Matan Ruak apresia hosi nia diskursu fó pose ba PA Arsénio Paixão Bano iha Palasiu Governu Sesta (12/06).
Matan ruak esplika nomeia prezidente autoridade ne’e prerrogativa ida Konsellu Ministru nian ka governu nian maibé fó pose ne’e prerrogativa ida Primeiru Ministru nian.
Iha biban ne’e Xefe Governu fó kedas parabéns ba prezidente eleitu Arsénio Paixao Bano, tanba hanesan joven ida ne’ebé mak toma konta ba autoridade ida depois de Mari Alkatiri no José Luis Guterres.
“Mari Alkatiri ho José Luis Guterres jerasaun rua ne’ebé uluk ba ami, ne’ebé hahú luta ba Timor ne’e ukun an no mós ho sira nia kontribuisaun iha dezenvolvimentu timor nian. Maibé ohin jerasaun ida ne’ebé foun ida ne’ebé tuir ha’u entaun ha’u hakarak fó parabéns ba ida ne’e”, Taur elozia.
Tuir observasaun serimónia tomada de Pose ne’e, Prezidente Rejiaun Espesial Oe-Cusse (RAE-OA) sesante José Luis Guterres la marka prezensa, maske antes ne’e halo konferénsia imprensa iha nia rezidénsia Farol katak, sei partisipa iha serimonia ne’e.
Jornalista: Jaime Pires
Editor: Mariano Martins
1,167 total views, 3 views today
Bele hare Video Seluk :