DILI (timorpost.com) – Iha loron 26 fulan Maiu 2023, kuaze tuku 08:30 OTL dadeer, akontese ahi han mutuk komunidade nia uma ida iha suku Usi-tasae, sub-rejiaun Oesilo, Rejiaun Administrativa Espesiál Oe-Cusse Ambeno (RAEOA).
Reprezentante komunidade suku Usi-tasa’e, Pedro Sufa, nu’udar mós viziñu iha fatin inséndiu ne’e haktuir kronolojia hosi akontesimentu ne’e katak, akontese ahi han uma ne’e, bainhira uma na’in laiha no hela de’it labarik ida mak hein uma, tanba ninia inan-aman ba hotu natar atu ko’a Hare iha Oekusi villa.
“Ahi ne’e mosu primeiru husi uma nia kakuluk mak tun mai, tanba uma ne’e duut, ne’ebé ahi ne’e mosu boot kedas, agora uma na’in mós laiha,” haktuir Pedro Sufa ne’ebé mak Timor Post asesu liuhosi pájina RCAL, Sesta (26/05).
Pedro afirma liután katak, uma na’in ho naran Agustino Neno Afoan no Filomena Sufa, maibé hafoin akontese Pedro Pauf informa kedas ba iha autoridade komanditáriu hodi bele hato’o pedidu ba iha autoridade protesaun sivíl RAEOA nian.
“Sasán hanesan roupa, hahán no seluk tan la aproveita, tanba akontese inséndiu uma na’in laiha. Ami hakfodak ahi suar sa’e maka’as los no ami halai mai atu salva netik sasán sira balun maibé ami labele halo buat ida,” Pedro haktuir tan.
Ho ida ne’e, Prezidente Autoridade Protesaun Civil (APC) iha RAEOA, Polisia Inspetór, Herman Metan, hatete, parte protesaun sivíl simu ona karta pedidu, tanba nia parte dezloka kedas ekipa ida ba iha fatin akontesimentu.
“Ha’u atu hateten de’it katak iha tuku 08:30 ne’e mak akontese inséndiu ahi han uma ida iha bairru Oelfaub, suku Usi-tasa’e, entaun ha’u dezloka ona ekipa APC ba fatin akontesimentu atu halo verifikasaun no mós fó apoiu emerjénsia,” nia relata.
Enkuantu, Autoridade Protesaun sivíl iha RAEOA, prepara ona apoiu emerjénsia ne’ebé mak oferese ba iha vítima inséndiu ne’e iha item rua, hanesan food item no la’ós food item.
3,332 total views, 3 views today
