(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post) – Prezidente Ikatan Keluarga Silat, Putra Timor Leste (IKS,PTL sigla lian Melayu), Silvester Xavier Sufa, husu ba membru sira bainhira ema halo festa labele ba hafuhu. Bainhira hetan konvite bele ba partisipa maibé karik la hetan konvite labele ba, atu nune’e bele evita konflitu ruma mosu.
“Iha organizasaun IKS nia laran, laiha ema ida atu ba hafuhu ema nia festa, o ba hafuhu hodi halo problema de’it, sei iha konvite mak ba, laiha konvite lalika ba festa,” nia informa ba jornalista sira, hafoin remata serimónia reativa Arte Marsiais, iha GMT, Kinta (26/05).
Nia hatete, IKS iha ekipa kada Aldeia ou bairru sira, liu-liu merkadu nian, hodi hare membru ne’ebé mak uza farda la’o tuun sa’e iha fatin ne’ebá sei duni sai husi organizasaun ne’e.
“Lalika uza farda ba mai iha fatin ne’ebé de’it, ami iha ekipa, ekipa ne’e mak hetan ita boot uza farda iha fatin ne’ebé mak la merese atu uza, ne’e haruka sai. Hasai ne’e la problema ne’e, hodi garante unidade, garante seguransa no garantia buat hotu-hotu para la’o ho diak,” nia afirma.
Kontribuisaun Arte Marsiais liu-liu ba prosesu dezenvolvimentu iha Timor Leste primeiru maka kontribuisaun ba seguransa, se seguransa la’o hakmatek dezenvolvimentu sei la’o ho diak,.
“Segundu IKS mós iha ona planu atu iha fatin ne’ebé no iha bairru ne’ebé ou munisípiu ne’ebé mak iha atividade sosiais no atividade seluk, IKS prontu bele ajuda, la presiza husu osan, la presiza husu buat ruma, IKS prontu koopera ho komunidade sira, tanba IKS iha ema barak, rekursu umanu mós iha, entaun sei estadu presiza atu ajuda saida deit, ami prontu ajuda”. Nia hatete.
Nia apela ba membru IKS iha Timor laran tomak katak ba membru ne’ebé mak la kontribui ba nasaun ne’e, tantu krime, tantu la koopera di’ak ona husi organizasaun IKS ninian sei hasai nia.
“Durante organizasaun sei Loke, ami hasai ema na’in-5, kompostu husi mane na’in-4 no feto na’in-1. Tanba ita hotu hatene katak, organizasaun ne’e, iha regra se bainhira la’o sala dalan sei hasai,” Nia hakotu. (Lee Notísia Seluk Iha Timor Post/Asesu You Tube Timor Post)
1,271 total views, 3 views today
Bele hare Video Seluk :
Subscribe to Timorpost
