DILI (Timor Post) — Reitór Semináriu Menór Balidi, Padre Angelo Salsinha, hatete sidadaun ne’ebé mak merese sai Prezidente Repúblika tenke ema ne’ebé iha prontidaun atu serbí povu.
“Ukun ne’e hodi tau matan ba povu nia moris, se mak sente nia matenek prontidaun para bele serbí nasaun no povu,” dehan Padre Angelo, ba Timor Post iha knaar fatin semináriu SENOFA Balidi, Sesta (30/7).
Nia haktuir, sidadaun ne’ebé kandidata aan signifika nia sente katak nia bele sa’e ba prezidente atu kontribui ba ema hotu nia di’ak no nia bele ona atu responsabilidade maturidade intelektuál, koñesimentu ne’ebé kle’an ba povu nia identidade povu nia kultura povu nia istória.
Nia dehan, partidu polítiku sira tenke iha maturidade polítika, kompromisu polítika ne’ebé partidu sira halo ne’e la’ós kampaña ba bosok povu, polítiku sira tenke eduka sidadaun sai ema ne’ebé maduru.
Tuir amu Angelo, bainhira to’o iha tempu kampaña mak ba ko’alia ho povu, ida ne’e hatudu la iha maturidade polítika, la iha responsabilidade polítika.
“Polítiku ne’e la’ós tempu kampaña mak ita ba halo polítika hodi ba bosok malu, kompromisu ida ne’e durante tinan lima ne’e, o tenke tun eduka o nia povu ne’e loroloron, polítiku sira labele hein to’o kampaña mak ba bosok malu, o lori povu ne’e ba ne’ebé ita bosok malu to’o bainhira,” nia dehan. (61L)
1,400 total views, 3 views today
Bele hare Video Seluk :
Subscribe to Timorpost
