BALIBO (timorpost.com) – Prezidente Partidu Kongresu Nasionál Rekonstrusaun Timorense (CNRT), Kay Rala Xanana Gusmão, konsidera Sekretáriu Jerál Partidu FRETILIN, Mari Alkatiri, nu’udar traidor kontra soberania nasionál, tanba orienta deputadu bankada FRETILIN vota kontra proposta rezolusaun númeru 2/V (1a) kona-ba ratifikasaun tratadu fronteira maritima entre Timor-Leste no Austrália iha tinan 2019.
Xanana dehan, antes atu lori prosesu ne’e ba Parlamentu Nasionál, nia parte ho ekipa Gabinete Fronteira Maritima bolu no esplika informasaun hotu ba lider nasionál sira hanesan, José Ramos-Horta, Fransisco Guterres Lú-Olo no Mari Alkatiri hodi sira hotu komprende no intende didi’ak asuntu hirak ne’e, ikus mai vota kontra tiha.
“Ami esplika bebeik buat ne’e ba sira, sira akompaña buat ne’e ho didi’ak to’o nia rohan. Iha Governu FRETILIN Primeiru Ministru, Mari Alkatiri, asina tiha maka haruka ba Nova Iorke atu asina akordu ne’e entre Timor-Leste no Austrália. Mai fali haruka nia deputadu sira iha bankada FRETILIN vota kontra tiha, ida ne’e maka ha’u bolu nia traidor, ida ne’e kontra soberania nasionál ne’e. Ida ne’e kontra sakrifísiu sira ne’ebé ita-nia povu halo durante tinan 24 ne’e. Tanba ida ne’e maka atu kardeál fali ka, amu papa fali ka, dehan haruka ha’u ba hasoru Alkatiri, ha’u sei la ba hasoru, ó traidor, ha’u sei la hasoru ó,” Xanana dehan iha atividade konsolidasaun no natal hamutuk ho povu no militante partidu CNRT iha Postu Administrativu Balibo Vila, Munisípiu Bonanaro, ne’ebé Timor Post asesu komunikadu, Domingu (22/01).
Xanana dehan, bainhira Alkatiri husu deskupla ba povu tomak iha Timor-Leste maka nia foin bele fó perdaun.
Komandante Em-Xefe das FALINTIL hatutan, uluk nia rezigna aan hosi Primeiru Ministru Governu Dalimak Konstitusionál hodi hili Rui Maria de Araújo ba Primeiru Ministru, para fó biban ba Xanana lidera ekipa Gabinete Fronteira Maritima hodi luta ba soberania tasi Timor, nune’e deputadu FRETILIN labele vota kontra bebeik hodi nonok akompaña prosesu Timor-Leste lori Austrália ba tribunál internasionál tuur hamutuk rezolve disputra fronteira liuhosi prosesu konsiliasaun.
“Uluk tanba demokrasia ita bolu ema hotu- hotu mai ukun, ha’u fó tiha Oe-Kusse ba Mari, to’o ne’ebá hotu-hotu tenke tama FRETILIN, agora Arsenio Bano estraga liu tan ona. Korrupsaun boot teb-tebes justisa la la’o. Justisa buka ne’e maka sira bee (halo korrupsaun) ho osan $4000, $3000, justisa kala ema sogok-sogok. Tanba ne’e maka ita presiza, persija tempu foun hodi hadi’a tiha foer sira ne’ebá ne’e. Agora ho Mari ha’u sei la kaer liman, ha’u bolu nia traidor. Tanba sa?. Tanba iha sira-nia Governu asina akordu ida ho Austrália simu osan barak, para labele ko’alia fronteira maritima durante tinan 50. Bok tun bok sa’e, la bele ba tiha Governu depois mak fó tiha Governu ba FRETILIN (Bolu Rui Maria de Araújo sai Primeiru Ministru) maka ha’u ba book fronteira maritima,” nia hateten.
Nia hatutan, “Partidu istóriku boot ida, lider matenek boot ida, fó hela de’it hanesan ne’e. Tanba ne’e maka iha Quintu Governu ha’u ses aan hosi primeiru ministru ha’u ba defende ita-nia soberania ita foun iha mundu tomak la hatene ita buka bolu Austrália mai tuur obriga sira rekoñese ita-nia direitu maka ida ne’e. Konkorda malu tiha iha ne’ebá lori dokumentu sira ne’e ba hotu, Primeiru Ministru Mari Alkatiri entrega ida ne’e dehan, ida ne’e ejize katak, ita boot sira estuda didi’ak, la komprende ami sei bolu advogadu sira sei mai ko’alia ho imi komprende tiha maka aprova hodi haruka ba ONU. Bolu advadu sira ne’ebé ajuda ita ne’e mai esplika ba Mari kona-ba prosesu konsoliasaun ne’e, esplika buat hotu- hotu, nia (Alkatiri) konkorda. Iha Konsellu Ministru nia deside Primeiru Ministru Alkatiri asina ka aprova katak, governu Timor-Leste konkorda haruka ba Sekretariu Jerál maka foin asina akordu iha ne’aba. Mai fali, atu ratifika akordu ne’e iha parlamentu, Mari Alkatiri haruka Aniceto Guterres hodi husu deputadu Bankada FRETILIN vota kontra totál ratifikasaun fronteira maritima iha 2019,” nia konta.
Eis Primeiru Ministru ne’e konta tan, bainhira nia aprezenta dokumentu konsiliasaun iha Parlamentu Nasional, Prezidente PN iha momentu ne’eba Aniceto Guterres husu fali tenki halo dialogu.
“Ami ba Parlamentu Nasionál, Aniceto husu fali tenke halo diálogu. Ha’u hatan ba nia, diálogu maka entrega tiha Primeiru Ministru ba Rui Maria de Araújo, ida ne’e la’ós diálogu?, Aniceto kakutak mamuk,” Xanana hirus.
To’o notísia ne’e, hatun seidauk hetan konfirmasaun hosi Sekretáriu Jerál Partidu FRETILIN, Mari Alkatiri.
16,644 total views, 3 views today
Bele hare Video Seluk :
Subscribe to Timorpost
