DILI (timorpost.com)-Saudoza Isabel da Costa Ferreira Ruak nia mate, ema hotu hakfodak no sente lakon boot ida. Iha tempu hanesan, públiku nia atensaun ba Kayrala Xanana Gusmão la marka prezensa to’o serimónia funerál.
Husi ibun ba ibun, iha rede sosiál ema espresa admirasaun. Balun até da’et ba kestaun polítika ke durante ne’e hatudu Xanana ho Taur Matan Ruak fila kotuk ba malu, maibé mós balu dehan dook iha matan, besik iha fuan.
Haree de’it husi dook sente laran moras, hanesan maun rezisténsia no polítika nia alin Taur Matan Ruak nia espoza maka hakotu nia peregrinasaun iha mundu, maibé Xanana la partisipa iha serimónia tomak to’o funeral.
Video no imajen ne’ebé fó sai iha públiku, Lere Anan Timur, Falur Rate Laek, Maunana, Sabika, Aluk, no sira seluk ba fó sentidu kondolénsias ba faluk no oan kiak ne’ebé saudoza Isabel da Costa Ferreira husik hela, maibé Xanana la mosu.
Ho situasaun susar ne’ebé gerrilleiru Taur Matan Ruak hasoru, loke hikas sira nia memória maun alin iha ai-laran la husik malu, halo alin sira ne’e tenke turuk ho mata-been.
Jestu hirak ne’ebé komandante gerrilleiru sira hatudu iha públiku, hatudu katak, sira nunka soe malu iha situasaun difisil no tempu saida de’it, hanesan uluk sira sei iha ai-laran terus hamutuk nu’udar maun ho alin.
“Jestu sira ne’e hatudu ba públiku katak, gerrilleiru sira nunka soe malu ou husik malu iha situasaun difisil, hanesan uluk sira sei terus iha ai-laran”, relata iha pájina facebook Lere Anan Timur.
Nune’e mós lia dadolin balun ne’ebé Timor Post sita husi pájina facebook Amândio Sarmento, ne’ebé sita ho títulu alin lutu metan boot, maun halo festa boot, ne’ebé ema atus ba atus maka asiste.
“Ema atus ba atus presta omenajen triste ba alin, ema atus ba atus festeja aniversáriu maun nian”, sita iha pájina ne’e.
Iha pájina ne’e katak, motor ho karreta trankadu iha dalan Metiaut lian triste nian, maibé mós motor no karreta trankadu iha Salaun Oka Hudi-laran ho lian kontente nian.
“Ne’e sinál hatudu katak, maun ho alin kala laiha ona relasaun, triste tebes loron ida ohin ne’e”, nia triste.
Maski nune’e, Timor Post observa iha salaun OKA RUDAL Hudi-laran, komisaun sira deside atu dansa, maibé Prezidente Partidu ho Sekretáriu Jerál Partidu CNRT aviza atu labele dansa, tanba iha hela situasaun tristeza, figura na’in-rua hanesan saudozu Luis Lobato ho saudoza Isabel da Costa Ferreira, maka fila ona ba aman maromak ninia kadunan Santo.
“Ita iha hela situasaun triste, saudozu Luis Lobato ho saudoza Isabel da Costa Ferreira, ne’ebé ita tenke respeita malu, tuir loloos labele halo festa”, aviza iha konferénsia nasionál, Tersa (20/06).
Antes ne’e mós, Prezidente Partidu CNRT, Kay Rala Xanana Gusmão, hato’o ona sentidu kondolénsia ba saudozu Luis Lobato ho saudoza dona Isabel da Costa Ferreira, liuhusi um-minutu silénsiu iha abertura konferénsia nasionál partidu mais votadu.
“Lori partidu nia naran fó sentidu triste mós ba senor Luis Lobato, ne’ebé ohin loron ita bolu ona fila ba aman maromak nia kadunan Santo”, nia deklara.
Nune’e mós harohan no hato’o sentidu kondolénsia ba família saudoza Isabel da Costa Ferreira, nia oan, nia kaben Taur Matan Ruak, atu forsa nafatin simu realidade hirak ne’ebé maromak hakraik ona ba ida-idak nia vida.
2,046 total views, 3 views today
Bele hare Video Seluk :