DILI (Timor Post) – Militante hosi Partidu Frente Revolusionáriu Timor-Leste Independente (FRETILIN), iha Suku Fatuhada, afirma pozisaun liuhosi Konferénsia Imprensa, katak hakarak Reformadu Tenente Jenerál, Lere Anan Timur (LAT), atu Lidera Partidu FRETILIN iha períodu tinan 2022-2027.
Portavós, Flávio Simões “Udan boot”, hatete apoiante, militante no simpatizante sira hosi Suku Fatuhada, Postu Don Aleixo, Munisípiu Dili, apoiu maioritária hakarak lori Reformadu Tenente Jenerál, Lere Anan Timur ba ukun fali iha Komité Sentrál FRETILIN (CCF) nian.
“Ami masa nu’udar jerasaun ba FRETILIN, delegadu balun hahú iha Tinan 1974/5 ohin loron sei nafatin lealdade ba polítika partidu nian,” nia hateten iha Suku Fatuhada, Aldeia 01, Kuarta (07/09).
Nia dehan, sira konxiente katak iha devér atu asegura FRETILIN iha situasaun saída de’it.
“Ita fiar FRETILIN nia misaun atu lori naroman mai povu maubere, hanesan reprezenta fitun mutin nu’udar símbolu iha Bandeira FRETILIN no RDTL,” nia subliña.
Tanba ne’e sira fó obrigadu ba Kamarada Francisco Guterres Lú Olo ho Mari Alkatiri, maibé husu atu konsidera malu hodi moderniza dezempeñu polítika FRETILIN nian ba oin.
“Hanesan jerasaun tuan FRETILIN nian, ami respeita, maibé hanesan militante no simpatizante, husu atu labele taka dalan ba Lere Anan Timur, hodi lidera iha CCF liuhosi kongresu nasionál ne’ebé hahú iha loron 8-10 Fulan Setembru 2022.
Militante sira ne’e mós husu nafatin ba delegadu no delegada sira ne’ebé halo kongresu, tenke mai ho kulturál Demokrátika, tanba FRETILIN mak aman no inan no Huun loloos ba demokrasia.
“Ami hili Lideransa foun tuir ami-nia kongresista sira-nia aspirasaun, hodi garante vitória iha eleisaun Parlamentár Tinan 2023, tanba ne’e ami hakarak delega Lere Anan Timur ba lidera fali no assume Kargu iha CCF”, nia afirma.
Nia hatete, sira apoiu LAT atu bele avansa liuhosi nia pakote rasik, tuir nia analiza, sabedouria polítika.
“Ami fó apoiu tanba mai ho lema ida katak hakuak povu hotu, la’ós dehan atu lori FRETILIN ba manan iha eleisaun parlamentár, maibé iha prinsípiu ida atu lori Nova espíritu ida ba estadu Timor-Leste,” nia hateten.
Ikus nia dehan, iha loron kongresu hosi pakote jerasaun tuan, hanesan Lú OLo ho Mari hasoru pakote foun Rui Maria de Araújo no Reformadu Tenente Jenerál, Lere Anan Timur, sei konsidera malu hodi lori prinsípiu ida katak, hamutuk FRETILIN no nasaun Timor-Leste la’o ba oin.
3,077 total views, 3 views today
Bele hare Video Seluk :