DILI, (timorpost.com)—Relasiona ho eleisaun suku ne’ebé sei monu iha fulan Abríl tinan 2024, Prezidente Parlamentu Nasionál, Maria Fernanda Lay enkoraja feto maluk sira atu kandidatu-an hodi kompete iha eleisaun suku.
Maria Fernanda Lay, hatete liga ho eleisaun suku ne’e, lei iha ona, oinsá mak feto sira atu kompete iha eleisaun suku ne’e.
“Ha’u hatete lei iha ona, agora feto prepara an atu kompete la’os loron ida ba kalan ida mak ita iha kapasidade ka iha prosesu ida, “Prezidente Parlamentu Nasionál (PPN), Fernanda Lay hatete ba jornalista sira hafoin remata enkontru ho Prezidente Repúblika iha Palacio Prezidensiál, Bairu-Pite, Kuarta (17/04).
Prezidente Parlamentu Nasionál, enkoraja feto sira, atu kandidatu-an, tanba nia uluk atu servisu iha Parlamentu Nasionál ne’e, liu husi prosesu ida ne’ebé la’ós fasil.
“Ha’u ohin loron ho fiar sempre Primeiru Ministru maun bo’ot Kay Rala Xanana Gusmão ha’u nia Prezidente ho Sekretáriu Partidu tau ha’u iha Parlamentu Nasionál, mas tinan 50 ha’u hahú servisu ho tinan 19 ohin loron ha’u idade 60 la’os fasil, tun sa’e maibé iha firme ita nia desizaun, ha’u sempre aprende saida de’it to’o agora to’o Prezidente Parlamentu Nasionál di’ak ida,” nia esplika.
Ho ida ne’e, nia enkoraja feto maluk sira atu kompete iha saida de’it, tanba lei iha ona.
“Klaru ba eleisaun suku ha’u uluk ko’alia depois ha’u nia tomada de posse enkoraja feto katak fó fiar ona agora lei permite ita ba oin mais firme ita nia kompeténsia,” nia afirma.
Molok ne’e, Diretor Jeral Sekretariu Tekniku Administrasaun Eletoral ( STAE), Olviro Fernandes Moniz, hatete orsamentu ne’ebé prevee ba eleisaun tinan ne’e, provizóriamente $182.709,50.
“Suku 10 mak sei realiza eleisaun suku iha fulan Abríl nia rohan” Nia haktuir.
Suku 10 ne’e ho ninia aldeia 53, kompostu hosi munisípiu Dili Postu Administrativu Cristo Rei, Suku Ailoc ho ninia aldeia lima, Postu Administrativu Dom Aleixo Benonuk, Madohi no Manleuana ho ninia aldeia hamutuk 28,Postu Administrativu Metinaro, Suku Manteloão ho ninia Aldeia neen.
Munisípiu Aileu Postu Administrativu Laulara, Suku Bocolelo Aldeia hamutuk haat, Postu Administrativu Aileu, Suku Lequitura, Aldeia haat.
Munisípiu Manatuto Postu Administrativu Lacló, Suku Laicore, Aldeia Haat, Suku Uma-Caduac Aldeia ida, no Postu Administrativu Barique, Suku Sikone-Diloli, Aldeia hamutuk rua no munisípiu Viqueque Postu Administrativu Ossu, Suku Builo iha Aldeia Haat.
Entretantu husi suku 10 iha aldeia 53, tuir dadus provizóriu eleitór ne’ebé sei partisipa iha votasaun ne’e hamutuk 26.992.
1,074 total views, 3 views today
Bele hare Video Seluk :
Subscribe to Timorpost
