DILI (Timor Post)- Kadete Foun FALINTIL-Forsa Defeza Timor-Leste (F-FDTL), Nain-tolu Elimana iha faze teste, tanba la prenze Kritériu.
Koordenadór-2 ba Rekrutamentu F-FDTL Tenente Koronel Mario Baptista, hatete Teste ba aplika foun sira ne’e hahú kedas iha loron horisehik no ohin no sei remata iha fulan Agostu tinan ne’e.
Nia dehan, iha faze teste ne’e, tuir kriteriu ne’ebé F-FDTL nian iha ona, kriteriu teste ba Médiku hanesan tilun, Matan no nehan, nune’e ba sira ne’ebé nehan tolu mak laiha, parte sira sei deside no elimina kedas iha momentu ne’e.
Nune’e mós, kona-ba altura mak la tuir kritériu ne’ebé iha hanesan feto ho altura 158 ho mane 165, sira-nia parte sei elimina kedas iha momentu faze teste.
“Tanba ne’e, horisehik aplikante Na’in-60 mai tuir teste, Na’in-tolu mak la prenze kritériu ne’ebé iha, entaun ita elimina kedas, iha mane Nain-rua nia altura mak la to’o iha 165 no iha feto ida mak moras,” nia dehan iha Sentru formasaun no treinu Metinaru, Tersa (26/07).
Nia dehan, kona-ba Psikoteste, Fizíku no Médiku ne’e, normalmente halo uluk mak kona-ba teste Médiku, hafoin pasa mak tuir tan teste kona-ba rua seluk.
Nia dehan, aplikante horisehik ho ohin mai tuir teste nain-120, kada loron sira atende uluk nain-60, nune’e sira ne’ebé horisehik, ohin no aban ne’e, sira husi Munisípiu Dili nian mak mai tuir uluk teste ne’e.
“Ita mós servisu hamutuk ho Ministériu Saúde ita husu para sira fó ajuda doutor sira ne’ebé iha espesialista kona-ba ida ne’e, ne’e tinan-tinan iha kooperasaun,” nia informa.
Nia dehan, husi númeru 1421 ne’e tuir hotu teste, hafoin sira halo opersaun final, depois mak desizaun final husi Prezidente ho vise komisaun rekrutamentu, hafoin sira hasai lista ne’ebé aptu 600, ne’ebé atu tuir rekrutamentu hafoin sira bele lori fila fali lista ne’e ba taka iha Munisípiu sira.
“Hafoin ita taka sai naran iha kada Munisípiu, depois ita marka loron ida tuir kalendáriu sira, atu nune’e para nain-600 ne’e, mai aprezenta an iha Segunda semana,” nia dehan.
Alende ne’e, Xefe Saúde Rekrutamentu F-FDTL, Tenene Koronel, Guido de Oliveira, hatete teste ba iha tinan ida ne’e, sira iha oráriu tanba ne’e, mak kada loron sira simu kadidatura nain-60 de’it, hodi halo ezaminasaun.
“Ezaminasaun ne’e, kompostu husi parte mak hanesan, ida saúde F-FDTL rasik, ami forsa armada husu apoiu husi Hospital Nasionál Guido Valades (HNGV), fó apoiu rekursu espesialista sira, hodi apoiu ami durante fulan ida tomak,” nia dehan.
Nia hatete, horsehik ne’e tuir lolos sira nia parte simu kandidatu Nain-60, maibe horisehik kandidatura nain-41 de’it mak marka presenza iha ne’e, nune’e sira-nia parte dehan, tanba saida mak sira husi nain-60 ne’e la mai hotu, ida ne’e komisaun sira mak hatene, la’ós sira-nia kompeténsia.
1,513 total views, 3 views today
Bele hare Video Seluk :