DILI, (timorpost.com)– Sosiedade Sivíl ka Organizasaun Naun Governamentál (ONG) Luta Hamutuk (LH) ho Asia Justice And Rights (AJAR) husu governu liu-liu Ministériu Komérsiu no Indústria atu labele uza povu nia naran hodi aprova atribui subsídiu hodi fó bosu ba malu ho kompañia sira iha vila laran.
“Ita la bele lori povu nia naran, depois fó bosu ba malu iha vila laran, presiza investiga lai, foos subsídiu foin lalais 4 millaun nian ne’e too ona iha ne’ebé, se mak han, tanba munisípiu balun too agora seidauk hetan saku ida, subsídiu ne’e ba de’it povu iha munisípiu ka too iha Postu, tanba tuir norma no tuir lójika ne’e subsídiu ne’e ita fó ba povu ne’ebé mak iha area rurais susar atu asesu ba iha merkadu no susar iha kestaun finanseira, maibé foos la too iha postu, “dehan Diretór Ezekutivu Luta Hamutuk, Jose Alves da Costa, ba jornalista sira iha nia kna’ar fatin Kuarta (10/04).
Nia dehan, liga ba foos folin sa’e ne’e, tuir hatete katak antes governu fahe ona subsídiu foos ne’e iha kleur ona, ba períodu segundu mós hotu tan ona, maibé agora kompañia ezije atu selu, maibé iha foho ne’e nein governu fó subsídiu, la hatene fó subsídiu ne’e se maka han, ne’ebé, tenke hare didi’ak ba subsídiu ne’e.
Iha sorin seluk, Diretór Ezekutivu HAK, Feliciano da Costa, hatete presiza iha implementasaun ida rigor ba iha lei sira, liga ba folin foos, Ministru la bele lansa de’it iha surat leten, maibé iha monitorizasaun ne’ebé sira la halo rotina.
“Ha’u hanoin funsionáriu lubuk ida ba iha Ministériu Komérsiu Indústria (MKI) ne’e, orienta de’it halo oinsá monitoriza superviziona implementasaun ne’e iha terenu, se ate adata povu la menta nafatin kona bá folin foos, signifika asaun konkreta seidauk iha, se governu la halo intervensaun ne’ebé di’ak, signifika sira viola povu nia direitu, povu atu asesu ba iha foos ka hahán refere ne’ebé sira la bele ona, signifika katak viola ona povu nia direitu ida ne’e, “dehan Felisiano.
Diretur ne’e katak, presiza troka tiha Ministru ne’ebé maka tula iha Ministériu Komérsiu Indústria, tanba la iha kapasidade atu jere ida ne’e.
Hatán ba preokupasaun nee, Vise-Primeiru-Ministru no Ministru Koordenadór bá Asuntu Ekonomia no Ministru Turizmu no Ambiente, Francisco Kalbuadi Lay, hatete liga ho públiku nia preokupasaun kona ba foos folin sa’e ne’e, governu orienta ona ekipa hodi halo observasaun ba iha munisípiu hotu.
“Daudaun ne’e, Governu orienta ona ekipa tun ba munisípiu ida-idak hodi halo observasaun ba sira ne’ebé fan foos, maibé balun iha area rurais sira kontinua fan ho folin sa’e,” dehan Vise-Primeiru-Ministru no Ministru Koordenadór bá Asuntu Ekonomia no Ministru Turizmu no Ambiente, Francisco Kalbuadi Lay.
Aleinde nia dehan, problema foos ne’e, koko no tenta ona dezde tinan uluk, liuhusi vise Primeiru, nia rasik hodi fó subsídiu, maibé hatete katak se subsídiu lao beibeik iha rai ne’ebé de’it mós sei la konsege rezolve ida, maibé oinsá mak ekipa sira koko atu halo monitorizasaun ba iha munisípiu sira, atu bele hatún folin foos.
1,929 total views, 3 views today
Bele hare Video Seluk :
Subscribe to Timorpost
