MANUFAHI (timorpost.com)—Prezidente Parlamentu Nasionál (PPN) hamutuk ho grupu feto Parlamentu Nasionál Timor-Leste (GMPTL) no feto potensiál munisípiu Manufahi, selebra loron Internasionál feto-rural iha suku Grotu, postu administrativu Same, munisípiu Manufahi.
Tema ba komemorasaun ne’e “Feto prontu lidera, sai husi hamlaha no mukit”.
Iha eventu komemorasaun ne’e, Prezidente Parlamentu Nasionál (PPN), Maria Fernanda Lay iha diskursu hatete, preokupa ho situasaun ne’ebé agora daudaun akontese iha Timor-Leste inan-feto sira soe bebé iha fatin-fatin.
Nune’e nia dehan, aleinde feto soe bebé no mós moras HIV-SIDA agora daudaun hahú invade to’o iha área rural.
“Ha’u triste tebes kuandu ha’u lee informasaun ne’ebé fó sai husi media katak bebé sei iha inan nia kanotak sofre ona moras HIV-SIDA “dehan Prezidente Parlamentu Nasionál (PPN) Maria Fernanda Lay iha Grotu, Kinta ne’e.
Tanba ne’e liu husi komemorasaun loron Internasionál feto-rural ne’e husu ba timoroan hotu atu hamutuk servisu makaas hodi kombate situasaun ne’ebé daudaun ne’e mosu iha Timor-Leste, no moos kombate violénsia hasoru feto no labarik feto sira iha Timor-Leste.
Entretantu Administradór Munisípiu Manufahi Arantes Isaac Sarmento, hato’o agradese ba PPN deside komemorasaun loron Internasionál feto-rural ne’ebé selebra iha Suku Grotu.
“Ho komemorasaun ne’e feto sira hotu tenke orgullu tanba primeira vés iha Timor-Leste inan feto ida lidera Parlamentu Nasionál ne’e hatudu katak feto prontu duni atu lidera”. Haktuir administradór.
Administradór Arrantes haktuir, hanesan autoridade munisípiu apresia ba feto-rural sira ne’ebé kontribui tebes ba aspetu ekonomia iha família.
“Iha Manufahi feton-rural sira kandidata a’an ba eleisaun órgaun suku hamutuk ema na’in 23 kompara ho tinan 7 ba kotuk maibé ba tinan ida ne’e feto sira entuziazmu tebes kandidata-aan ba xefe suku”.
Igualdade jéneru la’ós buat foun ida iha Timor-Leste maibé igualdade jéneru idéntika ona ho tradisaun no kultura povu Timor Leste, tanba bei’ala sira harii uma lisan iha ai riin 4 ne’ebé kompostu husi ai riin feto no ai riin mane ne’e hatudu igualdade jéneru iha tiha ona tempu bei’ala sira “nia salienta.
Iha okaziaun ne’e partisipante feto husi suku Grotu, Domingas Santa, hato’o agradese ba selebrasaun loron Internasionál feto rural iha suku Grotu liu husi selebrasaun ne’e bele hato’o preokupasaun.
“Ami agradese tebes tanba ho eventu komemorasaun ne’e ami bele hato’o problema ne’ebé durante ne’e feto sira hasoru iha suku Grotu kona-ba estrada ne’ebé kondisaun la dun di’ak inklui bee moos sai problema bo’ot ba inan feto sira tanba bee hanesan mate moris “nia hakle’an.
Portantu hafoin komemora loron importante ne’e PPN, GMPTL no autoridade sira halo lansamentu plaka hatutan programa Maubisse III no kontinua kedas diálogu ho feto rural no komunidade sira.(lcl).
1,749 total views, 3 views today
Bele hare Video Seluk :
Subscribe to Timorpost
