DILI (timorpost.com) – Diresaun Nasionál Transporte Terestre (DNTT) rejista transporte TUM-TUM ne’ebé sirkula iha munisípiu Likisá hamutuk 20.
“Ami foin rejista motor TUM-TUM ne’ebé sirkula iha munisípiu Likisá hamutuk 20 hodi tula pasajeiru sira ba merkadu atu sosa buat ruma ba sira nia nesesidade loron-loron nian”, informa xefe seksaun transporte públiku DNTT, Bernardo Vicente Fernandes Soares, ba Timor Post iha nia servisu fatin DNTT Balidi, Kinta (15/06).
Xefe seksaun transporte públiku ne’e haktuir, iha semana hirak ba kotuk motorista TUM-TUM husi munisípiu Likisá mak ba rejista ona iha diresaun DNTT nian.
Maibé motorista husi TUM-TUM husi munisípiu Manatutu no Lautem to’o ohin loron seidauk ba rejista iha DNTT hodi hatene loloos motor TUM-TUM ne’ebé sirkula iha munisípiu rua ne’e hamutuk hirak.
“Ami hein hela bainhira maka motorista TUM-TUM husi munisípiu rua ne’e mai rejista atu nune’e DNTT bele hatene motor refere nia kondisaun di’ak ka lae, nia dokumentu kompletu ka lae no nia merese sirkula iha terenu hodi tula pasajeiru sira ba merkadu”, Bernardo hateten.
Nia dehan, TUM-TUM ne’e DNTT autoriza so sirkula iha munisípiu de’it, labele tula pasajeiru halai tama iha Dili laran, maibé kuandu ekipa DNTT hetan iha terenu sira sei fó sansaun ba motor refere multa ho osan tuir lei haruka.
Tanba motor refere halai ho velosidade 20 de’it, entaun halai kleur bele kria engarrafamentu iha oras dadeer, meiudia no lokraik, no bele kria dezastre, tanba karreta ho motor barak nia halai neineik ikus mai bele hetan dezastre ruma.
Ho problema hirak ne’e mak DNTT la autoriza motor TUM-TUM hodi sirkula iha Dili laran, tanba halai neineik liu kontribui engarrafamentu.
“Tanba ne’e mak ami husu ba motorista TUM-TUM labele sirkula iha Dili laran ekipa DNTT kontrolu iha terenu loron-loron maka hare TUM-TUM sirkula iha Dili laran sei fó sansaun maka multa ho osan atu nune’e sira labele halai iha Dili hodi tula pasajeiru sira”, nia hateten.
Nia dehan, sira fó ona informasaun husi media sira no halo ona sosializasaun ba iha públiku katak, motor TUM-TUM labele movimentu iha Dili laran hodi tula pasajeiru karik sira ulun toos sirkula iha Dili maka ekipa DNTT hetan sei fó sansaun no bele prende sira nia dokumentu ho hasai tiha xapa matríkula motor refere nian atu nune’e iha futuru labele halai tan.
3,358 total views, 3 views today
Bele hare Video Seluk :