DILI—Prezidente Repúblika (PR), Francisco Guterres Lú-Olo, asosia tebes komunidade timor-oan ho raan ne’ebé foti inisiativa iha tempu ida ne’e hodi hala’o serimónia Sambaia (Ritual reza).
“Ho laran solok mak ha’u asosia komunidade Timor-oan ho raan Xina ne’ebé foti inisiativa iha tempu ida ne’e hodi hala’o serimónia sambaia, ho objetivu ida atu haksolok loron referendum 1999,” dehan Prezidente Lú-Olo liu husi ninia mensajen ne’ebe hatoo husi Asesoria Sosiedade Sivil no Asuntu Sosiál Prezidente Repúblika, Zélia Fernandes, hafoin partisipa iha serimónia Sambaia.
Serimónia Sambaia ne’ebe halao iha rezidénsia Xina Maromak Bairru Formosa, Dili Sesta (29/08), Prezidente Repúblika apresia ho inisiativa ida ne’e di’ak tebes tanba hatudu katak, komunidade timor-oan budista koñese mós katak referendum mak loke dalan ba Timor-Leste restaura independénsia.
PR Lú-Olo mos iha ninia mensajen ne’e hatete Timor-Leste livre no sente onra no Timor-oan mak tenke hatene servisu hamutuk hodi moris di’ak ba povu tomak.
Lú-Olo konta mós ho maluk Xineza sira nia apoiu hotu se-se de’it sente hanesan Timor-oan la haree ba rasa, relijiaun, mane, feto maibé nu’udar sidadaun timor-oan iha direitu no devér hanesan.
“Iha ita nia luta libertasaun nasionál, ita simu malu no rona malu, ita presiza hatuur di’ak iha kondisaun murak no ida ne’e atu tau hamutuk matenek hodi servisu povu no rai doben Timor-Leste” dehan PR Lu-Olo.
Entretantu iha fatin hanesan Prezidente Asosiasaun Komersiál Komunidade Xineza Timor-Oan, Kathleen Gonçalves, hatete objetivu ida ne’e mai hosi komunidade Xineza Timor-oan tomak ba loron selebra tinan 20 konsulta popular.
“Loron ida ne’e importante tebes tanba iha momentu tinan 1999 liu ba deside ona Timor-Leste hetan ukun rasik-an iha tinan 20 liu ba tan ne’e mak ohin loron ita hotu fó liman balu hodi komemora loron istóriku ida ne’e” informa Kathleen.
Nia hatutan, iha momentu ne’ebá komunidade Xineza mai iha Timor-Leste to’o ohin loron halo tinan 107, tanba ne’e iha prosesu luta Timor-Leste atu hetan ukun rasik-an ne’e komunidade Xineza Timor-oan barak mós mate ba rai ida ne’e.
Nia haktuir, durante ne’e komunidade Xineza iha TL harii mós monumentu ida ba matebian sira iha Xina Rate Taibesi, kada tinan loron matebian nian sempre halo sambaia iha ne’ebá.(azu)
964 total views, 3 views today
Bele hare Video Seluk :