DILI (Timor post.com)— Loron 30 Agostu 1999 ne’e istória ne’ebé difisil tebes, ne’ebé la’ós simu husi bandeja ida, maibé ne’e mai ho prosesu ida ne’ebé difisil.
Loron 30 Agostu 1999, povu la tauk hamriik hodi fó votu-deside ukun rasik-an.
Tanba ne’e komemorasaun loron 30 Agostu 1999 ba dala-24, oinsá ita atu relembra justisa pasadu nian husi prosesu luta ne’ebé lori ita determina ukun an ne’e. Dehan diretór ezekutivu Asosiasaun HAK, Feliciano de Araújo iha CNE, Segunda (28/08).
Nia hatete, loron ida ne’e importante tebes ba jerasaun tuan no foun sira hotu, atu hanoin fali situasaun 1999 ba ukun-an nian, hodi halo mudansa no dezenvolvimentu ba rai ida ne’e.
Signifika, nasaun ukun-an ne’e mai ho kontribuisaun ba isin no ruin povu nian iha sosiedade tomak, tanba prosesu ida ne’ebé moruk, la’ós ita simu hanesan iha bandeja ida.
Tanba ne’e husu ba lideransa patriota tomak, presiza relembra povu terus iha loron 30 Agostu 1999, entaun tenke servi fali ba povu feto mane ne’ebé kontribui nia aan ba independénsia.
Loron 30 Agostu 1999 ne’e loron ne’ebé povu Timor-Leste la tauk hodi hamriik fó votu no deside ukun rasik-an liuhosi konsulta populár.
“Povu ne’e lakon tiha sira-nia ta’uk no hamriik hodi ba fó sira nia votu, hodi hili sira-nia futuru. Ita-nia Povu ba vota no deside, hodi fó prova katak loos duni, ita bele muda mundu.” Nia haktuir.
Referendu Timor-Leste nian mak sai hanesan lisaun ida ba mundu tanba povu hotu-hotu aten brani hodi deside no hakarak independénsia.
Ida ne’e maka hanesan ezijénsia hosi ema hirak ne’ebé fó-an ona ba mate no hanesan konxiénsia atu dalan ba dame ne’e labele sai kle’uk maibé hetok sai metin no dezenvolvimentu hetok sai sustentável.
798 total views, 3 views today
Bele hare Video Seluk :
Subscribe to Timorpost
