Dili (Timor Post)–Organizasaun Noun Governamentál (ONG) Belum, halo lansamentu relatóriu peskiza kona ba impaktu Lei Kontra Violénsia Doméstika (KVD), hodi bele hametin liu tan estratéjiku parseria iha implementasaun Lei KVD iha futuru ba sosiedade Timor-Leste.
Tuir Peskizadora Ofisial Jéneru ONG Belum, Maria Fatima Sara, hatete, lansamentu ida ohin ne’e, relasiona ho programa Spot light inisiativa ne’ebé mak realiza iha tinan kotuk 2021, nune’e ONG Belum mós hola parte liu iha pillar primeiru, no mós pillar terseiru.
“Pillar primeiru nian haree liu ba iha lejizlasaun nian, ne’ebé mak halo peskiza ba iha Lei KVD iha Komunidade, ne’e mak agora daudauk ne’e lansa no halo aprezentasaun ba Lei KVD ninian, ne’ebé mak kolabora hamutuk ho UN Women, no parseiru sira seluk hodi halo peskiza ba area kobertura iha Munisípiu tolu hanesan, Bobonaru, Vikeke no Ermera, iha Postu neen (6), no Suku neen (6),” nia informa iha Timor-Plaza Suai Room, Kinta (30/06).
Nia hatutan, iha métodu peskiza ne’e, husi parte sira uza foku grupu, no mós entrevista ho parseiru implementador sira, nune’e mós diskusaun foku group hamutuk ho feto maluk sira iha area kobertura ne’e.
Enkuantu total ba iha entrevista ou ba iha parseiru implementador sira hamutuk na’in-40, kompostu husi Mane na’in-20 no Feto na’in-20. Nune’e mós ba diskusaun foku grupu hamutuk ho Feto maluk sira na’in-224.
Atu informa tan de’it katak, ONG Belum mós hola parte iha programa Spot light inisiativa ne’ebé mak iha pillar neen (6), maibé ONG Belum hola parte iha pillar primeiru ne’ebé mak haree liu ba iha Prevensaun Violénsia Hasoru Feto no Labarik Feto.
“Tanba ne’e mak ita hatene katak, Lei KVD ne’ebé mak ninia ezisténsia dezde iha tinan 2010, nune’e oinsá ita atu haree impaktu sira ba iha ita nia komunidade sira. Husi ida ne’e mós ONG Belum hola parte iha ninia pillar terseiru ne’e mak, peskiza, dezenvolve polítika, no mós halo advokasia,” nia informa.
1,679 total views, 6 views today
