DILI (Timor Post)—Vise Xefe Estadu Maior Jeneral FALINTIL Forsa Defeza Timor Leste (F-FDTL), Maijor Jeneral Falur Rate Laek informa, militar foun ida halai sai tan tanba bele la augenta ho formasaun iha Metinaro, Dili.
Falur haktuir, kazu ne’e ba dala rua militar foun ida halai uluk iha semana hirak liu ba, maibé komisaun rekrutamentu troka fali ho membru foun ne’ebé valor di’ak liu, no ba ida ne’e bele la troka ona tanba matéria formasaun barak mak liu ona.
“Tama iha vida militar la’ós buat fasil, ne’e difisil daudaun ne’e kadetes foun 600 treinu iha metinaru, ida katik sai tanba la aguenta iha militar,” Falur hatete ba Jornalista sira hafoin enkontru ho Prezidente Repúblika Francisco Guterres Lú Olo, Kuarta (20/10/2021).
Falur husu atu sé de’it maka hetan militar foun ne’ebé halai ne’e informa ba komandu atu halo kapturasaun.
“Halai lakon agora ba subar, imi deteta karik ajuda para ami bele ba kaer, prosesu mai publiku para ita transparente liu tan,” Falur afirma.
Falur hatutan, formasaun la’o durante ne’e matéria ensinu sistematizadu to’o ona iha nivel ida ne’ebé labele repete tan. Tanba ne’e, ba sira ne’ebé la augenta sai, foun labele tama tan tanba foin aprende hatais sapatu, hatais farda, forma, oinsá la’o.
“Desde ami nia joventude iha ne’eba terus, luta, luta too ohin loron, iha neeba ne’e la’ós tau farda taka pankat ne’e la’ós halimar ne’e sakrefísiu boot,” Falur komenta.
Falur dehan, arepende ho joven ne’ebé halai husi militar tanba sei iha joven seluk ne’ebé hakarak duni maibé la konsege liu iha prosesu selesaun. (61L)
1,663 total views, 3 views today
Bele hare Video Seluk :