Dili (timorpost.com) – Relasiona ho loron finadu iha (02/11), Atonioan ba sunu lilin iha tasi-ibun área Tasi-tolu.
“Ohin ami mai sunu lilin iha tasi ibun ne’e relasiona loron 2 Fulan Novembru hanesan loron ne’ebe ita hanoin fali ita-nia Matebian, maski ita do’ok malu”, Atonioan Romualdo Eco, dehan ba Timor Post online, iha área Tasi-Ibun Tasi-Tolu, Kuarta (02/11).
Tanba ne’e ohin sira ne’ebé ba sunu lilin iha ne’ebá tanba sira la konsege viajen ba Rejiaun Administrativa Espesial Oe-Kusi Ambenu (RAEOA), hodi tuir finadu.
“Objetivu ohin ami mai iha tasi-ibun ida ne’e, hodi hanoin no sunu lilin ba ita matebian sira mezmu ke ita la ba to’o sira-nia rate fatin iha RAEOA no iha fatin seluk”, nia afirma.
Nia dehan, loron ida ne’e signifika loron matebian, tanba ne’e ohin mai iha ne’e hodi sunu lilin fó sinal tuir kultura Timor nian atu harohan nafatin ba Na’i halo matebian sira-nia klamar moris nafatin, haraik nafatin naroman ba sira, hodi sira bele haksolok ho anju no santo sira iha reinu lalehan.
Tuir Observasaun Timor Post online, nota iha terenu katak Atonioan sira hela iha sidade Dili, ne’ebé la konsege ba sira nia Munisípiu, nune’e iha loraik ida ne’e tuku 4:00 too tuku 8:00 ho balun oras Timor-Leste sira ba sunu lilin no kari ai-funan hamutuk iha tasi ibun hodi selebra loron finadu.
Enkuantu iha balun mós lori ho kafe, Dosi ruma, sigaru, katupa, bebidas balun, signifika han hamutuk hasoru Matebian no han hamutuk ho Matebian sira iha Tasi-ibun ne’ebá.
3,020 total views, 3 views today
Bele hare Video Seluk :
Subscribe to Timorpost
