DIli (timorpost.com) — Lider Istóriku, Kay Rala Xanana Gusmão, Sesta (24/02/2023), hamutuk ho ekipa lori apoiu ai-han báziku ba vítima inséndiu Karantina Terra Santa, Tasi Tolu Dili.
Apoiu ne’ebé ekipa Xanana oferese maka hanesan, fos karon 53, supermie 53, mina 53 inklui fugaun, sanan kiik, bikan masa, ember, kopu masa, trina etu nian no ropa ba labarik kiik sira.
Inséndiu ne’e kauza hosi serkuitu eletrisidade ne’ebé akontese loron Kinta-Feira (24/02/23) oras kuaze 19:10 kalan ne’e rezulta uma no sasán hosi xefe família 50 ho totál abitante na’in 235 la konsege salva.
Iha vizita ne’e, Xanana ho ekipa simu hosi família vítima inklui labarik kiik hodi halikar ‘Viva-Viva Avó Nana” kontinua kumprimente hodi informa kronolojia inséndiu ne’e.
Durante vizita Xanana observa direita armazein karreta para fatin Bombeiros nian iha Komoro ladun seguru ba vítima sira liu-liu inan isin rua no labarik sira, nune’e ho ekipa buka kedas fatin balun iha kapital ne’ebé identifika seguru hodi muda sira provizoriu ba hela to’o buka solusaun ba sira-nia hela fatin.
“Ha’u haree ona inan isin rua no labarik sira toba fatin ladun di’ak, ita bele lori apoia ai-han no ropa mai, maibé sira-nia fatin toba ladun di’ak liu-liu ba labarik no inan isin rua no avo feto no avo mane sira tenke haree fatin di’ak ruma muda imi provizoriu ba ne’ebá to’o imi-nia fatin hadi’a fali,” dehan Xanana.
Iha fatin hanesan, Xefe Suku Madohi, Bernardio de Cristo Ferreira no Xefe Aldeia Terra Santa Tasi Tolu, Esperança de Jesus, hamutuk ho vítima sira sente kontente, tanba bele apoia vítima sira inklui buka fatin seguru labarik no inan isin rua sira.
“Obrigadu ba avó nia vizita, agora fatin provizóriu maka ne’e, maibé ita rasik haree katak, toba fatin ladun seguru, ami prontu koopera para ita muda sira ba fatin di’ak ruma to’o hadi’a sira-nia kondisaun hela fatin foin bele fila,” dehan Xefe Aldeia Esperança.
Hafoin buka fatin balun iha sidade Dili, tuir planu, Sábadu (23/02/23), Xanana hamutuk ho ekipa Bombeiros sei muda vítima sira ba fatin ne’ebé ekipa identifika ona.
2,331 total views, 6 views today
Bele hare Video Seluk :
Subscribe to Timorpost
