(Reportajen Jaime Pires/Editor Mateus da Cruz)
Dili (Timor Post)- Sekretáriu Jerál Partidu CNRT, Francisco Kalbuadi Lay, informa, aban, kampaña ikus segunda volta kandidatu prezidente repúblika Jose Ramos Horta iha Tasitolu, tanba ne’e nia husu ba militante no apoiante sira atu respeita ba regra estrada no evita monu ba provokasaun.
“Relasiona ho kampaña Prezidensiál ne’ebé agora atu besik remata ona, CNRT hakarak fó hatene ba militante no apoiante sira husi kandidatu José Ramos Horta, aban kampaña ikus sei hala’o iha Tasi-Tolu,” nia dehan liu hosi konferénsia imprensa iha Sede CNRT, Bairru Dos Grilhos, segunda (11/03).
Nia husu ba militante no apoiante hosi kandidatu prezidente Ramos Horta atu kontinua respeitu no fó onra ba loron Páskua semana santa ida ne’e, ba kampaña karik kontinua respeitu ema hotu-hotu no kumpre nafatin regra sira ne’ebé mak lei haruka.
“Respeitu sinais tránzitu hodi respeitu lei estrada nia hodi hadook an husi bandu ba kódigu estrada nian, labele monu ba provokasaun hodi hamosu distúrbiu ne’ebé bele prejudika estabilidade iha Kapitál Dili,” nia husu.
Kampaña sei hahú iha tuku sia dadeer to’o tuku neen loraik, enkuantu Kandidatu Prezidente Repúblika José Ramos Horta, sei hato’o nia komísiu iha tuku rua loraik.
“Husu ba militante no apoiante sira hotu kria ambiente dixiplina, respeitu malu no tau ambiente pás no dame durante komísiu kampaña,” Nia dehan.
Ikus liu Nu’udar Sekretáriu Jerál Partidu CNRT, hakarak agradese ba hotu-hotu nia apoiu durante períodu kampaña hahú husi RAEOA to’o Lospalos horisehik, ne’ebé la’o di’ak tebes ho hakmatek pás no dame.
Ikus liu nia husu ba militante no apoiante sira hotu atu jere nafatin direitu ba vota iha loron 19 fulan Abríl, keta haluha vota ba númeru (1). (Lee notisia seluk iha Timor Post/Asesu You Tube Timor post)
773 total views, 3 views today
Bele hare Video Seluk :
Subscribe to Timorpost
