Jornalista Jaime Pires / Editór Noémio Falcão
DILI (Timor Post)—Prezidente Partidu Os Verdes, António Lelahuno Cruz, Tersa (10/08/2021) ba hasoru Primeiru Ministru Taur Matan Ruak iha rejidénsia Farol, Dili.
Sorumutu ne’e ho objetivu partilla prosesu rejistu Os Verde hanesan partidu polítiku no hasoru nu’udar oan ho aman hodi hetan bensaun.
Os Verdes hanesan kandidatu ba partidu polítiku ne’ebé iha hela prosesu rejistu iha Ministériu Justisa no Tribunál.
Ba Jornalista sira, Prezidente Lelahuno subliña, Taur Matan Ruak hanesan mós aman ba nasaun. Nune’e, iha sorumutu ne’e Lelahuno esplika ho klean kona-ba Os Verde nia vizaun ba estadu no ba Timor Leste.
Tuir fali kona-ba dezafiu sira ne’ebé mak sira hasoru liga ba prosesu rejistu partidu Os Verdes, tanba tinan ida ne’e rejistu partidu lubun ida hasoru dezafiu ho partidu sira ne’ebé mak uluk rejistu ona.
“Ikus liu mak ami husu hanesan aman fó lia menos ba ami nia partidu ba ami nia apoiante sira no inan aman sira hotu, ka fó Bensa no nia maluk hodi buras matak ba partidu Os Verdes hodi konsistente no determinante hodi lori partidu ne’e to’o nia objetivu final”, tenik Nia.
Nia aumenta, mensajen Primeiru Ministru nia ohin fó ba Partidu Os Verdes mak, tempu ona joven sira atu brani hodi hamriik iha partidu ida hodi fó obsaun ba dezenvolvimentu sosiu ekonómiku kulturais no ambientais ida ne’e.
Nia mós subliña, oras ne’e dadaun Partidu Os Verdes moris ona iha Timor-Leste, maibé seidauk rejistu tanba sei iha prosesu, tanba antes ne’e sira lori ona ba rejistu maibé sira indefere dala rua ona.
“Ami lori uluk ba Tribunal Rekursu sira indefere tiha, depois aprezenta tan faze daruak ami mós hetan tan indeferementu husi Ministeriu Justisa, depois ami aprezenta rekursu ba aprezenta fali ba Tribunal sira afavor ba desizaun Ministeriu Justisa ninia, katak aprezenta mós Kartaun komprovativu sira hodi rejistu partidu”, tenik Nia.
Atu hakotu nia dehan, agora sira kontinua halo preparasaun hodi prenxe rekezitu sira hotu, tuir planu iha fulan Setembru no Outubru nia laran sei ba rejistu ona, hodi Kompete iha Eleisaun Prezidensiál no Parlamentár tinan agora atu mai ne’e.
1,048 total views, 3 views today
Bele hare Video Seluk :