Dili (timorpost.com)—Juventude husi Aldeia Baura-Ikun ho Basana, Suku Taz-Hilin, Postu Administrativu Zumalai, Munisípiu Covalima, hato’o lamentasaun relasiona ho problema ne’ebé akontese iha loron, 29 de Maiu 2023 (segunda kalan) mais ou menus tuku: 9:11 OTL.
Husi akontesimentu ne’e, hanesan juventude ami kestiona ho kapasidade Lideransa Komunitária Xefe Suku Taz-Hilin, Martinho Magno ne’ebé la neutru tanba durante problema ne’ebé mak akontese iha Suku Taz-Hilin aldeia Galitas, xefe suku la hato’o deklarasaun ruma ba parte kompetente hodi atua problema refere.
“Ami kondena Martinho Magno hanesan xefe suku ka lideransa komitariu, ne’ebé la neutru iha ami joven sira nia leet, tanba ne’e, ami lamenta tebe-tebes ho deklarasaun ne’ebé mak xefe suku taz-hilin hato’o ba media ne’e la justu ka laloos, tanba la konta kronolojia akontesimentu husi problema ho los, tanba ami konsidera akontesimentu ne’e iha asaun mak iha reasaun”. Sita Timor post husi konferénsia imprensa ne’ebé hato’o husi juventude Aldeia Baura-Ikun ho Basana ne’ebé realiza iha Bairru-Pité, Segunda (05/06/2023.
Istória Kronolojia
Kauza husi problema refere mak asaun provokativu lubuk ida ne’ebé joven husi parte Taz-Hilin ho Galitas halo mak hanesan, halo ameasa no impede ema hotu nia movimentu iha dalan públiku parte jalan toll. Iha loron 23 de Maiu de 2023, família ho naran Jacinto Guterres hanesan ema moras mental hetan sona iha parte kidun husi aldeia Galitas.
Iha dia 25 de Maiu de 2023 ami família matebian husi aldeia Baura-Ikun ba hakoi mate isin iha semitériu parte Galitas, ami nia motorizada lima para iha dalan ninia hetan estragu. Iha dia 29 de Maiu de 2023 família husi señór Paulo de Araújo hetan asaltu iha nia rezidénsia, husi joven parte Tashilin ho Galitas. aktu provokasaun hirak nee mak husi parte joven Galitas ho Tashilin halo beibeik.
Kronolojia loloos husi akontesimentu sira hanesan/ iha loron segunda dia 29 de Maiu de 2023 iha kalan tuku 9:11 OTL katak, iha momentu ne’ebá vítima Paulo de Araújo ho nia família husik hela uma mamuk, tanba ba hadeer mate uma iha Aldeia Bauraikun.
Liu tia minutu balu joven husi aldeia Bauraikun rona katak joven husi Tashilin ho Galitas halo atake ba señór Paulo nia rezidénsia, hafoin ida ne’e joven husi aldeia Bauraikun simu hasoru halo reasaun. Iha akontesimentu ne’e vítima Paul nia uma hetan estragu, inklui sasán balun.
“Ami juventude husu ba parte Seguransa PNTL Munisípiu Covalima ho Komandante Eskuadra Postu Zumalai atu uza kapasidade ho professional iha atuasaun, atu buka tuir joven sira ne’ebé sempre halo asaun provokativu ka grupu vandalizmu ne’ebé lakohi halo ema moris lao ho livre”.
Husu ba autoridade lokál sira tenke servisu ho neutru no parsiál, husu mós ba lider arte marsiais hotu-hotu atu fó hatene ba membru arte marsiais sira kria pás no estabilidade iha suku Taz-Hilin.
“Ami mós sente lamentavel ho publikasaun produtu jornalista RTTL no Cova5 news ne’ebé publika hosi mídia rua refere, tanba la iha balansu tanba ne’e hakarak husu redasaun rua ne’e atu oriente nia jornalista sira servisu ho professional, liuliu iha publikasaun sira tenke balansu”.
Ikus liu, ami nia ezijénsia katak ba futura ami hakarak moris livre, ami husu ba Komandante Geral PNTL atu tau postu seguransa permanente ida iha Suku Taz-Hilin atu nune’e bele asegura ami nia inan aman ka joven sira iha ami nia suku Taz-Hilin, tanba ami nia suku ne’e sai hanesan fatin konflitu husi uluk ate agora.
14,312 total views, 3 views today
Bele hare Video Seluk :
Subscribe to Timorpost
