Dili (timorpost.com) — Embaixadora Portugal iha Timor-Leste, Manuela Bairros, Segunda (13/02) hala’o vizita kortezia mai Media Timor Post hodi haree direta situasaun no kondisaun Media ne’e nian.
Embaixadora Portugal ne’e, sama ain iha edifísiu Timor Post, Bebora, iha oras tuku 09:57 dadeer.
Hafoin hasoru malu ho Ekipa Timor Post iha oras tuku 10:00, ne’ebé lidera husi Diretór Ezekutivu Timor Post, Jacob Ximenes, aprezenta kedas istória kona-ba prosesu harii Timor Post nian ba embaixadóra.
Iha ámbitu reuniaun ne’e, Diretór Timor Post, Jacob Ximenes, konta uitoan kona-ba istória oinsá iha tempu susar nia laran hafoin referendum hari media Timor Post.
“Media Timor Post hari iha loron (29/02/2000), husi joven na’in-14, ne’ebé mai ho esperiénsia luan ne’ebé durante ne’e sai hanesan jornalista iha media STT (Suara Timor Timur), durante okupasaun Indonézia, ida ne’e sai hanesan jornál primeiru depois de era referendum”, nia hateten.
Nia haktuir, kona-ba ezisténsia harii media Timor Post ne’e la’ós fasil, difisil tebes depois de ukun an, maibé tanba ho Maromak nia tulun liuhusi donator sira liuliu Mr. Boob husi Australia ne’ebé ho aten barani ajuda no fornese ami hodi fó formasaun mai ami kona-ba papél jornalizmu nian iha era independénsia.
Iha ámbitu diskusaun ne’e embaixadóra, Manuela Bairros, agradese ba Timor Post tanba bele koopera no servisu hamutuk iha língua portugeza.
“Ha’u agradese ba Media Timor Post ba iha oportunidade loron ohin hodi bele mai rona diretamente istória Timor Post nian”, nia afirma.
Embaixadóra ne’e mós haksolok tanba Media Timor Post liuhusi nia pájina espesiál jornál nian bele fornese ona lingua portugés ba maluk leitora sira.
“Ha’u husu atu ida ne’e nafatin kontinua servisu, hodi fornese lingua portugés ne’ebé di’ak ba maluk leitora sira, ha’u husu atu jornál ne’e labele iha kapitál de’it maibé tenke aloka mós ba munisípiu sira”, nia hateten.
Iha diskusaun ne’e mós, embaixadora rasik husu atu Timor Post, mantein nafatin formasaun língua portugeza nian ba jornalista sira hodi nafatin buka aprende atu bele serve kliente no leitora sira ho língua akademia no formal.
Nia haktuir, formasaun kursu lingua portugés importante tebes, atu bele aumenta kapasidade jornalizmu nian iha ámbitu servisu nu’udar jornalizmu nian sai di’ak liután iha futuru.
Reuniaun ne’e sai hanesan reuniaun dahuluk entre Media Timor Post ho Embaixadora Portugal iha Timor-Leste, Sra. Manuela Bairros.
3,005 total views, 3 views today
Bele hare Video Seluk :
Subscribe to Timorpost
