Timor Post (14/01/2021)—Koordenadór Jerál Expo Dubai Timor-Leste, Manuel Vong, fiar liuhosi promosaun iha nivel mundiál Expo Dubai sei lori vantajen ba Timor-Leste.
Vong hato’o asuntu ne’e ba jornalista sira iha Parlamentu Nasionál, kinta (14/01), hafoin remata audiénsia ho komisaun espesializada ba asuntu ekonomia no dezenvolvimentu.
Iha produtu rua maka Vong hatete atu lori ba hatudu iha Dubai maka produtus estanjiveis no intanjiveis.
“Produtus intanjiveis kona-ba potensialidade kada munisípiu nian ligadu ho area prinsipál tolu, Agrikultura, Turizmu no Petróleu. Portantu, area tolu ne’e ita prepara iha video hodi bele aprezenta duni liuhosi promosaun virtual no marketting, no produtus estanjiveis, hanesan produtu agríkola, produtu artezanatu, produtus mineiru no minerais ne’ebé mak ita iha. Portantu, produtu sira ne’e hotu ita disponivel iha ita nia-rai laran”, dehan eis reitór DIT.
Vong haktuir nu’udar ema peritu iha area turizmu nia hato’o ba reprezentante povu katak atu garante sustentabilidade iha forum internasionál ne’e presiza mós lei espesífiku ba turizmu nian.
“Ho esperiénsia no koñesimentu ne’ebé mak hau iha kona-ba turizmu, hau hanoin presiza haree lei kona-ba turizmu, para garante duni kontinuidade no sustentabilidade iha forum internasionál ida ne’e”, hatutan Vong.
Nia hakarak Timor-Leste bele lori husi mundu mai fali Timor hosi forum ida ne’e, maski produtu ne’ebé nia mensiona ho kuantidade ki’ikoan, maibé nia ho kualidade produtus Timor nian, Timor sei hetan merkadu inklui Timor lori investidores atu investe iha setór, turizmu, agrikultura, petróleu ho transporte, aero ho marítimu.
“Se ita hadi’a ida ne’e mak konektividade turista sei mai”, Vong konklui.(Jornalista: Julio Salinas Soares, Editor: Mariano Martins)
486 total views, 3 views today
