DILI (Timor Post.com)—Deputadu Antonino Bianco husi Bankada Frente Revolusionáriu Timor-Leste Independente (FRETILIN), husu Prezidente Repúblika (PR) Jose Ramos Horta atu klarifika didi’ak oinsá minimizasaun ba volume Funsionáriu Públiku (FP) iha liña ministériu sira ou hadi’a lei.
Prezidente Horta rasik liu husi Grande entrevista GMN TV, iha loron Segunda-feira (10/09/2023), sei minimiza volume funsionáriu Públiku (FP) kada liña ministériais sira, nune’e husu atu deklara di’ak.
“Ha’u husu atu Prezidente Repúblika esplika didi’ak ba argumentu kona ba atu halo redús ba funsionáriu Públiku iha liña ministerial sira tanba PR nia deklarasaun sira ne’e, ko’alia barak loos ona iha públiku, atu hatún volume funsionáriu públiku sira iha kada Ministérial sira maibé seidauk akontese”. Hatete deputadu Antonino Bianco ba Jornalista sira iha PN, Kinta-feira (14/09/2023).
Nia haktuir, Statementu PR nian ne’e presiza klarifika loos atu públiku hatene katak loos dunik iha redusaun ba volume Funsionáriu Públiku (FP) iha liña ministériu sira ou hadi’a mak lei atu bele hatene katak kada instituisaun governu nian presiza funsionáriu hira.
Atu reforma funsionáriu Públiku lei tenke klaru, nune’e bele minimiza volume funsionáriu nian.
“Objetivu husi lei atu tau barreira ida katak kada instituisaun presiza funsionáriu Públiku hira atu bele funsiona servisu instituisaun.” Nia dehan.
Deputadu afirma, ministériu hothotu tenke halo planu estratéjia ba dezenvolvimentu rekursu umanu, nune’e bele justifika dadus ideal no funsionáriu hira mak presiza asegura ba Interese instituisaun iha liña ministériu sira.
“Ita husu atu Prezidente Repúblika, deklara loloos, atu halo re formasaun ba ema ka lei, tanba tu’ir ita hatene, husi volume funsionáriu públiku mak hasa’e kualidade no kuantidade administrasaun públiku nian iha Timor Leste.” Deputadu Bianco hateten.
1,011 total views, 24 views today
