DILI (Timorpost.com)—Lei Eleisaun Suku la hatete atu hakat ba eleisaun terseira volta, bainhira kandidatu na’in-rua impate iha eleisaun segunda volta, maibé depende ba desizaun ne’ebé maka Meza Asembleia Suku no Postu Administrativu deside.
Vise-Prezidente Komisaun Nasionál Eleisaun (CNE-sigla portugés), Domingos Barreto, rekoñese duni katak iha eleisaun segunda volta ba lideransa suku nian, kandidatu xefe suku na’in-rua impate ka votu hanesan, iha Suku Molop Postu Administrativu Bobonaru, Munisípiu Bobonaru.
“Iha lei eleisaun suku la regula terseira ronda, maibé kompeténsia tomak iha meza asembleia suku no Administradór Postu Administrativu, atu deside,” Barreto informa ba jornalista sira, iha Salaun CNE, Kolmera, Kinta (16/11/2023).
Meza asembleia suku no Administradór Postu Administrativu, atu hola desizaun ba kandidatu impate, deside iha oin rua, ida, sira maka tenke deside halo nusa, rua, importante maka tenke iha Xefe Suku eleitu ida.
Agora, kandidatu na’in-rua impate iha eleisaun segunda volta ne’e, kabe ba kompeténsia kompozisaun meza asembleia suku atu deside, atu marka fali loron ida ka oinsá, importante maka tenke iha lideransa komunitáriu.
Nia esplika, lei númeru 9/2016 la ko’alia kona-ba eleisaun terseira volta, maibé kabe ba kompeténsia meza asembleia suku no Administradór Postu Administrativu, atu deside, agora sira deside halo nusa, ida fali dehan rezigna-aan ou atu halo saida, ikus liu tenke iha xefe suku ne’ebé maka eleitu.
Karik liuhusi maneira atu fó ba malu ou atu ba eleisaun nian ne’e kabe ba meza suku nian no Administradór Postu Administrativu, la’ós povu maka hakarak ba eleisaun dala-ida, maibé meza maka tenke deside tuir lei haruka.
Tuir loloos ne’e meza asembleia suku ho Administradór Postu Administrativu sira deside ona ba desizaun ne’e, sira deside ona no haruka ona nia rezultadu mai ona Postu Administrativu, atu submerte mai nasionál. Agora sei iha faze ida sira atu informa mai, CNE la fó prazu, tanba kompeténsia iha ona sira, tanba lei númeru 9/2016 la fó kompeténsia ba CNE ho STAE.
CNE kaer nafatin artigu 75 hodi tau matan nafatin aktu eleitorál tomak ne’ebé akontese iha rai laran, meza maka deside iha ne’ebá, importante ema ida eleitu iha xefe suku ne’ebá. Lei la hatete terseira ronda, mais meza maka atu deside.
1,878 total views, 6 views today
Bele hare Video Seluk :
Subscribe to Timorpost
