Dili(timorpost.com)—Xefe Bankada PLP, Maria Angelina Lopes Saramento, hatete, kona-ba lei protesaun labarik no joven sira iha perigu, governu no organizasaun relevante sira tenke tau atensaun.
“Lei ida ne’e foin tama em vigor iha tinan kotuk, ha’u hanoin katak Ministériu relevante hanesan MSSI, MJ no INDIKA ne’ebé mak iha papél atu haree kona-ba diretu labarik sira nian, entaun hosi lei ne’e fó ona oportunidade ba sira atu dezenvolve planu asaun oinsá atu responde ba situasaun negósiu Infatil ne’ebé maka la’o no buras iha ita-nia rain liuliu iha kapitál Dili”, Maria Angelina Lopes Saramento, hatete ba iha Uma Fukun Parlamentu Nasionál, Tersa (13/02).
Nia hatete, bele minimiza situasaun sira hanesan ne’e liuliu fó sosializasaun ba inan aman sira atu haree kona-ba diretu no devér oan sira nian, tanba direitu-oan sira nian mak atu estuda no eskola.
Agora ba inan aman sira iha devér tomak atu kria kondisaun ne’ebé di’ak ba oan-sira atu bele estuda no fasilidade ne’ebé natoon ba sira hodi bele prepara sira nia-an ba eskola no mós iha responsabilidade atu fó atividade negósiu no atividade ekonómika sira.
“Ha’u hanoin INDIKA, MSSI, MJ no Ministériu sira seluk ne’ebé relevante ho asuntu protesaun labarik no joven sira iha perigu bele haree situasaun ne’e nune’e lei ne’e tama em vigor karik iha duni efeitu pozitivu ba mudansa moris labarik sira nian”, nia Esplika.
Tuir Prezidente Komisaun F, Deputada Maria Barreto Goromali, hatete kestaun lei protesaun labarik no joven iha perigu, daudaun ne’e governu liuhosi MSSI agora kria hela stri komete ida hodi prepara planu asaun anuál ba implementasaun lei ne’e.
“Kona-ba labarik sira ne’ebé mak agora daudaun fa’an sasán barak, la presiza lei ida protesaun labarik ne’e, tanba estadu Timor-Leste mós ratifika ona konvensaun diretu labarik no mós ita iha lei kódigu penal no kódigu prosesu penal ne’ebé mak klaru iha ne’ebá no Institutu Defeza Nasionál Diretu Labarik iha nia kompeténsia tomak atu bele koopera ho entidade seluk hodi prevene labarik ne’ebé mak agora fa’an hela sasán”, Deputada Maria Barreto, iha uma ukun Parlamentu Nasionál, Kinta (15/02) .
Tuir nia katak, iha situasaun ekonomia uma laran, obriga labarik minoridade sira ne’e kontinua fa’an sasán iha dalan ninia. Tanba ne’e instituisaun relevante sira tenke tau atensaun ba asuntu refere.
“Ita mós hatene katak, iha labarik balun ne’ebé mak nia fa’an sasán, tanba situasaun ekonomia iha uma laran, tanba ne’e mak inan aman mak haruka, maibé iha labarik balun ne’ebé mak kompañia balun buka lukru liuhosi labarik sira, ida ne’e mak presiza governu liuliu INDIKA nia kompeténsia tomak oinsá atu bele halo advokasia hodi prevene no mós proteje labarik sira ne’e”, nia esplika.
Nia informa, Komisaun F kontinua ho nia papél ida ne’ebé mak atu bolu atensaun hosi entidade sira hotu inklui inan aman no mós komunidade sira atu haree katak, TL iha ona lei protesaun labarik no joven iha perigu ida ne’e katak, bainhira inan aman ida atu abandona nia oan ka atu halo violénsia hasoru nia oan tantu komunidade halo violénsia hasoru labarik ka joven mak hosi lei ne’e sei regula sira.
Nia hatete, loron 23 fulan Fevereiru agora komisaun F sei halo atividade hamutuk ho Prezidente Autoridade Munisípiu Baukau hodi halo uluk iha ne’ebá, atu bolu atensaun lider autoridade lokól no mós lider komunitáriu, relijiozu sira inklui inan aman ho edukadór sira atu partisipa halo diskusaun kle’an ba iha konteúdu hosi lei protesaun labarik no joven iha perigu.
3,576 total views, 3 views today
Bele hare Video Seluk :
Subscribe to Timorpost
