Relasiona ho atitude falsifikasaun diploma, la’ós pertense ba estudante sira ne’ebé estudu iha eskola públiku ka privadu, maibé akumula eskola hothotu tantu públiku no privadu, iha teritóriu nasionál.
Bazeia dadus ne’ebé hatudu iha ezame nasionál periodu 2023 konsege identifika estudante hamutuk na’in-139 maka falsifika diploma, ne’ebé estudante hirak ne’e la konsege partisipa iha ezame nasionál no lokál.
Estudante hirak ne’ebé maka falsifika diploma ne’e, mai hosi Eskola Sekundáriu Públiku lima iha munisípiu Dili no Eskola Ensinu Sekundáriu Privadu ida hosi munisípiu Covalima.
Daudaun ne’e, Inspetór Jerál hamutuk ho ekipa halo hela verifikasaun, hodi tuun ba terenu, identifika loloos se-se maka falsifika diploma no prosesu atu simu estudante tama iha eskola baziea kriteriu saida, atu ema ne’e bele responsabiliza rasik ninia aktu irregularidade.
Tanba ne’e semana ida ne’e ME sei buka hatene kauza loloos, nune’e hatene ema ne’e manorin na’in, servisu iha ME ka selu ema ruma maka sosa dokumentu ne’e.
Se hatene loloos karik ema ne’e servisu iha ME konserteza simu sansaun ruma ka suspende ninia servisu, tanba kazu falsifika dokumentu ka diploma falsu ne’e krime, entaun tenke la’o tuir lei haruka.
To’o agora Inspetór Jerál submete ona karta ba kurikulu, hodi hein estudante ne’ebé maka estudu ho diploma falsu, bele halo aprezentasaun iha Ministériu Edukasaun.
Hafoin Diresaun Jerál Edukasaun haruka ba Ministra Edukasaun (ME), Dulce de Jesus Soares, atu bele hola desizaun ba estudante hirak ne’e, bele tuir fali ezame ka lae.
Kuandu Ministra Edukasaun fó oportunidade ba estudante na’in-139 atu tuir fali ezame, entaun tinan oin mai, estudante barak maka kontinua estudu ho diploma falsu, di’ak liu estudante kategoria falsifika diploma lalika tuir ona ezame tantu ezame nasionál no lokál, nune’e lalika hafoer sistema edukasaun iha Timor-Leste.
Maibé, ita atu foti desizaun ne’e parte superior no Komisaun Funsaun Públiku maka iha kompeténsia atu bele foti desizaun ba pesoál ne’ebé falsifika dokumentu falsu, tanba kazu refere krime, ne’ebé depende ba na’i-ulun sira maka hola desizaun.
1,707 total views, 24 views today
Bele hare Video Seluk :
Subscribe to Timorpost
